Հարյուրից ավելի քուրդ ցուցարարներ՝ կանայք, երեխաներ և մեծահասակներ, այսօր Շահումյան հրապարակից ցուցապաստառներով շարժվեցին դեպի ՄԱԿ-ի գրասենյակ: Նրանք վանկարկում էին` «Էրդողան, մարդասպան», «Ամոթ Թուրքիային», «Ազատություն Օջալանին» և այլն:
Ցուցարարներից մեկը «Առաջին լրատվական»-ի հետ զրույցում նշեց, որ Թուրքիայում քուրդ քաղբանտարկյալների վիճակն այժմ սարսափելի է, և Թուրքիայի նախագահ Էրդողանը ամեն կերպ փորձում է ոչնչացնել քուրդ ժողովրդին.
«2012թ. սեպտեմբերի 12-ին Թուրքիայի 6 կալանավայրերում մոտ 70 քաղբանտարկյալներ միաժամանակ հայտարարել են հացադուլ: Անցել է շուրջ 60 օր: Հացադուլավորներին միացել են Թուրքիայի տարբեր կալանավայրերի շուրջ 10 հազար բանտարկյալներ, ովքեր պահանջում են կարճ ժամկետում, առանց նախապայմանի, թիվ 1 կալանավորին՝ քուրդ ժողովրդի առաջնորդ Աբդուլլահ Օջալանին, տալ ազատություն, անվտանգություն ու առողջութան պահպանման երաշխիքներ: Շուրջ մեկուկես տարի խստիվ մեկուսացված է քուրդ առաջնորդ Օջալանը:
Պահանջում են նաև դադարեցնել մայրենի լեզվի նկատմամբ Թուրքիայի մերժողական քաղաքականությունը՝ սկսած դատարաններից, պետական և վարչական կառույցներից, կրթական և մշակութային օջախներից, վերացնել բոլոր արգելքներն ու խոչընդոտները և տալ զարգացման հնարավորություններ ու պայմաններ»:
Ցուցարարները միջազգային կազմակերպություններին, հատկապես` ՄԱԿ-ին կոչ էին անում հավատարիմ մնալ սեփական լիազորություններին և ետ պահել Թուրքիային քուրդ ժողովրդի նկատմամբ հակաօրինական գործողություններից:
Նշենք, որ ցույցի մասնակիցները պարբերաբար նստում էին գետնին և Էրդողանի հասցեին վիրավորական արտահայտություններ հնչեցնում:
Ակցիան եզրափակեցին հետևյալ խոսքերով` եթե Թուրքիայի նախագահը չդադարեցնի քուրդ քաղբանտարկյալների նկատմամբ հալածանքները, ապա հացադուլին կմիանան նաև իրենք՝ Հայաստանում քրդական համայնքի անդամները:
