Այսօր «Ֆուկուսիմա-1» ատոմակայանում տեղի են ունեցել պայթյուններ, որոնք լուրջ ազդեցություն են ունեցել շրջակա միջավայրի վրա և սկսել են խուճապ առաջացնել մայրաքաղաք Տոկիոյում:
Ճապոնական լրատվամիջոցները հայտնում են, որ ուժեղ պայթյուն է գրանցվել ատոմակայանի երկրորդ էներգաբլոկում: Ճապոնիայի կառավարությունը հայտարարել է, թե հնարավոր է՝ վնասվել է երկրորդ ռեակտորը, և վտանգավոր նյութերի արտահոսք է գրանցվել: Ավելի ուշ նույն ատոմակայանի չորրորդ էներգաբլոկում հրդեհ է սկսվել, որը, ըստ Ճապոնիայի իշխանությունների, քիչ առաջ մարվել է:
Reuters գործակալության հաղորդմամբ, ինչպես ատոմակայանների շրջակայքում, այնպես էլ մայրաքաղաք Տոկիոյում արդեն նկատվում է ռադիոակտիվ ճառագայթման չափաբաժնի ավելացում: Ատոմակայանի երրորդ բլոկի մոտ այդ աստիճանը տարեկան թույլատրելի չափաբաժինը գերազանցում է ավելի քան 400 անգամ, իսկ մայրաքաղաք Տոկիոյում և Կանագավա պրեֆեկտուրայում, որը մայրաքաղաքին ամենամոտ գտնվող վարչատարածքային միավորն է, այդ չափաբաժինը գերազանցվում է գրեթե 9 անգամ:
Այսօր առավոտյան խուճապ էր առաջացրել նաև Ճապոնիայում Ֆրանսիայի դեսպանատունը, որը տեղեկացրել էր, թե առաջիկա 10 ժամերի ընթացքում ռադիոկատիվ ամպը կարող է հասնել մայրաքաղաք: Դեսպանատունն իր քաղաքացիներին խորհուրդ էր տվել խուճապի չմատնվել և չլքել բնակարանները: Թեպետ այդ տեղեկությունը հետագայում հերքվել էր, սակայն համաշխարհային լրատվամիջոցները հայտնում են, որ Տոկիոյում արդեն խուճապ է նկատվում։ Որոշ մարդիկ փորձում են տեղափոխվել դեպի արևմուտք, որն ամենաքիչն է տուժել երկրաշարժից:
Վարչապետ Նաոտո Կանը հրահանգել է 20 կմ շառավղով անհապաղ տարհանում իրականացնել, քանի որ ատոմակայնի շրջակայքում մնալն այլևս լուրջ վնաս կարող է հասցնել առողջությանը: Իսկ 30 կմ շառավիղով իրականացվում են կանխարգելիչ միջոցառումներ:
Այս տեղեկություններին անմիջապես արձագանքել է երկրի ֆոնդային բորսան: Մեկ ժամ առաջ երկրի տնտեսական ակտիվության ինդեքսն ընկել է 14%-ով` կազմելով 8.273 կետ:
