Ընթացիկ մրցաշրջանում տարբեր առաջնությունների ներկայացուցիչներ հիանալի մեկնարկեցին և հաղթարշավների հեղինակ դարձան: Առաջատար առաջնություններում վերջինն ընդհատվեց Մյունխենի «Բավարիա»-ի հաղթական ընթացքը: Հետադարձ հայացք ձգելով առաջատար առաջնությունների վրա՝ հիշենք թիմերի հաղթարշավները՝ առաջնությունների մեկնարկում:
Իսպանիա
«Ռեալ», 1961/62թթ. մրցաշրջան, 8 անընդմեջ հաղթանակ: Սերիայի ավարտը՝ 9-րդ տուր, «Ռեալ» – «Օվյեդո»՝ 0:1: Արդյունքը՝ Իսպանիայի չեմպիոն:
1956-60թթ. «Ռեալ»-ն անկասելի էր ամբողջ աշխարհում. թիմը հաղթող էր ճանաչվել նշված ժամանակահատվածում Չեմպիոնների գավաթի (Չեմպիոնների լիգա) բոլոր խաղարկություններում: Իսպանիայի առաջնության 1961/62թթ. մրցաշրջանում մադրիդցիները հերթական ռեկորդը սահմանեցին: Թիմն առաջնությունը մեկնարկեց հաղթանակով, որը շարունակվեց մինչև 9-րդ տուրը: «Ռեալ»-ն արտագնա խաղում զիջեց «Օվյեդո»-ին:
Անգլիա
«Տոտենհեմ», 1960/61թթ. մրցաշրջան, 11 անընդմեջ հաղթանակ: Սերիայի ավարտը՝ 12-րդ տուր, «Տոտենհեմ» – «Մանչեսթեր Սիթի»՝ 1:1: Արդյունքը՝ Անգլիայի չեմպիոն:
Վերջին անգամ «Տոտենհեմ»-ն Անգլիայի չեմպիոն է դարձել 1960/61թթ. մրցաշրջանում: Առաջնության մեկնարկից ի վեր Բիլ Նիքլսոնի սաները 2 ամիս չէին ճաշակել պարտության դառնությունը, իսկ առաջին 16 հանդիպումներից 15-ում հաղթանակ էին տարել: Նման մեկնարկից հետո ոչ մի թիմ չկարողացավ գահընկեց անել «Տոտենհեմ»-ին: Նշենք, որ այդ ժամանակ «Տոտենհեմ»-ի կազմում հանդես էին գալիս 17 խաղացողներ, որոնք կարողացան նվաճել նաև Անգլիայի գավաթը:
Իտալիա
«Յուվենթուս», 1930/31 և 1985/86թթ. մրցաշրջաններ, 8-ական անընդմեջ հաղթանակներ: Սերիաների ավարտը՝ 9-րդ տուր, «Յուվենթուս» – «Նապոլի»՝ 1:2 (1930/31) և «Նապոլի» – «Յուվենթուս»՝ 1:0 (85/86): Արդյունքը՝ Իտալիայի չեմպիոն:
Իտալիայում ռեկորդակիր «Յուվենթուս»-ը ռեկորդային մրցաշրջաններում չկարողացավ հեշտությամբ արժանանալ երկրի չեմպիոնի կոչմանը: 2 դեպքերում էլ լուրջ դիմադրություն ցույց տվեց «Ռոմա»-ն: 85/86թթ. մրցաշրջանում Սվեն-Գորան Էրիկսոնի թիմը նույնիսկ կարողացել էր շրջանցել «Յուվե»-ին: Սակայն մրցաշրջանի ավարտից 2 տուր առաջ «ջալոռոսիները» զիջեցին ետնապահ «Լեչե»-ին, իսկ Ջովանի Տրապատոնիի թիմն իր հնարավորությունը բաց չթողեց:
Գերմանիա
«Բավարիա», 2012/13թթ. մրցաշրջան, 8 անընդմեջ հաղթանակ: Սերիայի ավարտը՝ 9-րդ տուր, «Բավարիա» – «Բայեր»՝ 1:2:
Գերմանիայի Բունդեսլիգայում ռեկորդակիրը Մյունխենի «Բավարիա»-ն է, իսկ ռեկորդը սահմանվել է ընթացիկ մրցաշրջանում: Յուպ Հայնեսը հիանալի է աշխատում, իսկ մյունխենյան ակումբում հզոր կոլեկտիվ է հավաքված:
Անցած մրցաշրջանում նույնպես «Բավարիա»-ն հաջող էր մեկնարկել Բունդեսլիգայում, սակայն թիմը 2 ամիս շարունակ չէր կարողանում ուշքի գալ, իսկ «Բորուսիա»-ն այդ ընթացքում հաղթանակներ էր տանում: Արդյունքում՝ դորտմունդյան ակումբը երկրորդ անգամ անընդմեջ Գերմանիայի չեմպիոն հռչակվեց:
