ԱՄՆ փոխնախագահ Վենսը բացառել է կրոնապետությունը տապալելու նպատակով Իրանում ցամաքային ռազմագործողություն իրականացնելու տարբերակը։ Նրա խոսքերով, եթե Իրանի ժողովուրդը որոշի ապստամբել, ապա դա կլինի նրա որոշումը, Միացյալ Նահանգները «այլևս նման հարցով չի զբաղվում»։
Իրանի խորհրդարանի նախագահ Մոհամեդ Բաղեր Ղալիբաֆը, մինչդեռ, ժողովրդին դիմել է կոչով և ընդգծել, որ ԱՄՆ-ը ձգտում է «ոչ միայն փոխել Իրանի պետական կարգը, այլև տրոհել երկրի տարածքային ամբողջականությունը»։
Իսրայելական ynet-ը բացահայտել է, որ Իրանի դեմ փետրվարյան հարձակման նախօրեին Միացյալ Նահանգները «քրդերին ինքնավարություն է խոստացել, զինել նրանց, երաշխավորել օդային հարձակումներից ամուր պաշտպանություն, բայց քրդերի մշտական թշնամի Էրդողանին հաջողվել է Դոնալդ Թրամփին համոզել, որ իրանական տարածքում ցամաքային ռազմագործողությունը ծանր հետևանքներ կունենա»։
Իրանի տարածքային մասնատման «ծրագրի իրականացում», եթե ԱՄՆ-ը իրոք ցամաքային ռազմագործողության ծրագիր չունի, հնարավոր է միայն մի դեպքում՝ եթե քրդաբնակ և թուրքախոս տեղաշրջանները ապստամբեն և արտաքին լուրջ աջակցություն ստանան։ Իրանի քրդաբնակ շրջանները սահմանակից են Թուրքիային, թուրքախոս տարածքները՝ Ադրբեջանին։
Իրանի դեմ թե անցյալ, թե այս տարվա իսրայելա-ամերիկյան հարվածների օրերին Բաքվի մամուլը «միասնական Ադրբեջան», «բաժանված ժողովրդի միավորման» թեմաներին չի անդրադարձել։ Ըստ երևույթին, նաև դա նկատի ուներ Ղալիբաֆը, երբ անցյալ ամիս Բաքվում հայտարարել է, որ «պատերազմի ընթացքում Ադրբեջանը Իրանի կողքին» էր։
Արդյոք Իրանի դեմ նոր ճնշումների փուլում Ադրբեջանը «դարձյալ Իրանի կողքի՞ն» է։ Նախկին արտգործնախարար Զուլֆուգարովը ֆեյսբուքյան գրառումով անդրադարձել է Խուստուփի գագաթ վարչապետ Փաշինյանի վերելքին, «սահմանադրություն չփոխելու մտադրությանը» և հռետորական հարցադրում արել․ «Ժամանակը չէ՞, որ մեր լեռնագնաց հատուկ ջոկատայինները Նախիջևանից Ղարաբաղ և հակառակ ուղղությամբ ռազմերթ անեն»։ Ընդ որում, նա այդ «անհրաժեշտությունը» կապել է TRIPP+ ներդրումային ծրագրի տնօրենի պաշտոնում «ռուս-հրեական ծագումով Սոկոլովին նշանակելու» հետ։
Իրանի շուրջ իրավիճակը, երևում է, Բաքվում գնահատում են «ֆորս-մաժորի հեռանկարում», և կա առնվազն ընկալում, որ Իսլամական հանրապետության դեմ ցամաքային ռազմագործողությունը կամ քրդական և թուրքախոս բնակչության «ապստամբությունը Նախիջևանի հետ հաղորդակցության հաստատման հնարավորություն» է։ Ալիևը, ամենայն հավանականությամբ, ծանր է տարել ԱՄՆ պետական դեպարտամենտի պարզաբանումը, որ TRIPP-ի ծրագրով սահմանային և մաքսային բոլոր կարգավորումները մնում են Հայաստանի իրավազորության ներքո։ Ավելի վաղ Ադրբեջանի արտգործնախարար Բայրամովը ասել է, որ երթուղու «մուտքի և ելքի անցակետերը գտնվում են Ադրբեջանի տարածքում»։
