Այսօր Մասիսի շրջանի Դաշտավան գյուղի բնակիչները բողոքի գործողություներ են ձեռնարկել։ Նրանք բողոքում են իրենց հաշվին գրված խմելու ջրի վարձավճարների դեմ։
Նրանց ասելով, իրենք խմելու ջրի վարձերը վճարել են, սակայն բնակիչների հաշվի հավելյալ պարտքեր են գրվել։
Ավելին, մեզ հետ զրույցում բնակիչները տեղեկացրին, որ, եթե իրենց պահանջը չբավարարվի, կդիմեն ծայրահեղ քայլերի` ճանապարհները կփակեն, ինչպես նաև բողոքի գործողությունները կշարունակեն կառավարության շենքի մոտ ու նախագահականի դիմաց։
«Մարդիկ վճարումները կատարել են, բայց լրացուցիչ գումարներ են եկել, և հիմա այդ գումարները դատարանով պահանջում են։ Գնացինք մարզպետարան՝ մեզ չլսելու տվին, հիմա եկել ենք և գյուղապետարանի մոտ ենք բողոքում։Սա նախազգուշական բողոքի գործողություն է, սակայն եթե մեր նախազգուշացումը չընդունեն, կդիմենք ծայրահեղ քայլերի»,- մեզ հետ զրույցում ասաց մասնակիցներից մեկը։
