>Երեկ մեկնարկեց Չեմպիոնների լիգայի խաղարկության 1/8 եզրափակիչը: «Միլան»-ը հանրահայտ «Սան Սիրո»-ում ընդունեց անգլիական «Տոտենհեմ»-ին: Խաղից առաջ երկու մարզիչներն էլ լուրջ կադրային խնդիրներ ունեին. «Տոտենհեմ»-ից բացակայում էին վնասվածքներ ստացած Բեյլն ու Ջենասը, իսկ Ալլեգրին ոչ միայն չէր կարող խաղադաշտ դուրս բերել թիմի նորեկներ Կասսանոյին, Էմանուելսոնին և վան Բոմելին, այլև վնասվածքներ ունեին Ամբրոզինին, Պիրլոն ու Բոատենգը:
Առաջին խաղակեսն անցավ «խթաններ»-ի բացահայտ առավելությամբ: Ռեդնափի սաները հենց խաղասկզբից նախաձեռնությունը վերցրին իրենց ձեռքն ու անընդհատ երկար փոխանցումներով փորձում էին մրցակցի տուգանային հրապարակում գտնել բարձրահասակ Քրաուչին: Անգլիացու հետ պայքարում հաճախ հաղթող էր դուրս գալիս Աբբիատին, բայց դրվագներից մեկում հարձակվողի՝ արմունկով պատահական հարվածից հետո դարպասապահը վնասվածք ստացավ ու չկարողացավ շարունակել հանդիպումը: Նրան փոխարինեց Մարկո Ամելիան: Առաջին իրական վտանգավոր հարվածը կայացավ միայն խաղակեսի վերջին րոպեին. Վան դեր Վաարտի թնդանոթային հարվածը հիանալի ցատկով ետ մղեց Ամելիան:
Երկրորդ խաղակեսում արդեն բոլորովին այլ տեսարան էր: Ալլեգրին Զեեդորֆին փոխարինեց Պատոյով, և «Միլան»-ը սկսեց գործել երկու առաջ քաշված հարձակվողով` Պատո, Իբրահիմովիչ և մեկ ենթահարձակվողով` Ռոբինիո: Տանտերերի գրոհները գնալով ավելի վտանգավոր էին դառնում: Եթե առաջին խաղակեսում անկյունայինների քանակը 0:4 էր՝ հօգուտ հյուրերի, ապա երկրորդ խաղակեսում տանտերերի վաստակած 9 անկյունայինների դիմաց «խթաններ»-ն ընդամենը 1-ի իրավունքը ձեռք բերեցին: Գոմեսի դարպասի մոտ ամենավտանգավոր պահերն էլ ստեղծվեցին հենց անկյունայինների խաղարկումից հետո. բրազիլացին Յեպեսի գլխի հարվածներից հետո երկու անգամ փրկեց իր թիմին:
Իտալացիները հարձակվում էին, իսկ «Տոտենհեմ»-ը սպասում էր հակագրոհելու իր հնարավորությանը, որն ի վերջո տրվեց նրանց. 80-րդ րոպեին միլանցիները մրցակցի տուգանային հրապարակի մոտ կորցրին գնդակը, հյուրերն առանց վայրկյան կորցնելու գտան իրենց ամենաարագ ֆուտբոլիստին` Լենոնին, վերջինս արագության տակ շրջանցեց իր դիմաց մնացած միակ պաշտպան Յեպեսին և փոխանցում կատարեց կիսադատարկ դարպասի դիմաց մնացած Կրաուչին, որը 12 մետրից չվրիպեց: Վերջին տասը րոպեներն անցան «Միլան»-ի կատարյալ առավելությամբ: Խաղավարտից առաջ Ռոբինիոն մի քանի մետրից չկարողացավ գրավել դարպասը:
Հանդիպումից հետո իր մասին կրկին հիշեցրեց Ջենարո Գատուզոն: Տաքարյուն իտալացին նետվեց դեպի մրցակցի պահեստայինների նստարան ու սկսեց հաշիվներ պարզել Ռեդնափի օգնականի հետ, որին արդեն հասցրել էր հարվածել խաղի ընթացքում, բայց մրցավարը չէր նկատել:
Ինչևէ, «Տոտենհեմ»-ը հյուրընկալվելիս հաղթեց մինիմալ հաշվով և պատասխան խաղից առաջ արդեն հաջորդ փուլ դուրս գալու շատ ավելի լավ հնարավորություններ ունի: