ԱՄՆ պետքարտուղարների շարքում Հիլարի Քլինթոնը ռեկորդակիր է դարձել պաշտոնավարման ընթացքում այցելած երկրների թվաքանակով:
Երկրի ԱԳՆ վիճակագրության համաձայն` ներկայիս պետքարտուղարը, որը պաշտոնավարում է 2009 թվականից, եղել է 102 երկրներում: Արտասահմանյան այցերի վրա ամերիկյան դիվանագիտության ղեկավարը անցկացրել է գրեթե մեկ տարի` 352 օր:
Ըստ հաշվարկների` Քլինթոնը գործուղումների ընթացքում հատել է 1 357 414 կմ, այսինքն` իր «Բոինգ-757»-ով երկրի շուրջը պտտվել է մոտ 10 անգամ: Այս մասին տեղեկացնում է Itar-Tass-ը:
Մինչ Քլինթոնը արտասահմանյան այցելությունների թվով առաջատարը Մադլեն Օլբրայթն էր: Նա պաշտոնավարման ընթացքում եղել է 93 երկրներում: Օլբրայթը եղել է ԱՄՆ պատմության մեջ առաջին կին պետքարտուղարը: Նա ԱՄՆ պետքարտուղարի պաշտոնը զբաղեցրել է 1997-2011 թվականներին:
Երկշաբաթյա համաշխարհային շրջագայության ընթացքում, որը կավարտվի այսօր, ԱՄՆ 67-րդ պետքարտուղար Հիլարի Քլինթոնը այցելել է Ֆրանսիա, Աֆղանստան, Ճապոնիա, Մոնղոլիա, Վիետնամ, Լաոս, Կամբոջա, Եգիպտոս և Իսրայել:
64-ամյա Քլինթոնը վերջերս խոստովանել է, որ պետքարտուղարի պարտականություններն իրենից մեծ էներգիա են խլում` հավելելով, որ մտադիր է հանգստի անցնել նոյեմբերին կայանալիք նախագահական ընտրություններից հետո:
