«Բարսելոնա»-ի գլխավոր մարզիչ Խոսեպ Գվարդիոլան Չեմպիոնների Լիգայի կիսաեզրափակչի շրջանակներում ապրիլի 18-ին Լոնդոնում կայանալիք «Չելսի»-ի հետ հանդիպումից առաջ իր սաներին կոչ է արել ուշադրությունը սևեռել միայն այդ խաղին, ոչ թե հանգստյան օրերին «Ռեալ»-ի հետ հանդիպմանը:
«2009 թվականի համեմատ «Չելսի»-ում որոշակի փոփոխություններ են տեղի ունեցել: Ակումբում տարբեր մարզիչներ են աշխատել, բայց թիմի հիմնամասը պահպանվել է: Կարծում եմ, նրանք խաղում են նույն եռանդով: Հիանում եմ ֆուտբոլիստների այդ խմբով, քանի որ նրանք բազմիցս նվաճել են Չեմպիոնների Լիգայի կիսաեզրափակիչների և եզրափակչի ուղեգիր, ինչպես նաև գերազանց հանդես են եկել ազգային առաջնությանը:
Միայն «Չելսի»-ի հետ հանդիպումից հետո կարող ենք մտածել «էլ-կլասիկո»-ի մասին: Պարզապես հրաշալի է, որ մենք հնարավորություն ունենք մասնակցելու այսօր և շաբաթ կայանալիք հանդիպման կարգի խաղերի: Ես կհետևեմ, որ իմ սաներն առավելագույն չափով հավաք և ուշադիր խաղան, որպեսզի այդ տոնի մի մասնիկը լինեն:
«Չելսի»-ի հետ դիմակայությունը բարդ է լինելու: Թիմը հաղթել է Չեմպիոնների Լիգայի շրջանակներում սեփական հարկի տակ անցկացրած 5 հանդիպումներից 5-ում: «Ազնվականներ»-ը վառ, դիտարժան և անակնկալներով լի ֆուտբոլ են ցուցադրում»,- նշել է Գվարդիոլան:
