Մայամիում ընթացող թենիսի տղամարդկանց «Մասթերս 1000» շարքի մրցաշարի կիսաեզրափակիչում կհանդիպեն ATP վարկանիշային աղյուսակի երկրորդ հորիզոնականը զբաղեցնող Ռաֆայել Նադալը և չորրորդ տեղում գտնվող Էնդի Մարեյը:
Մայամիի «Մասթերս» մրցաշարի քառորդ եզրափակիչում Ռաֆայել Նադալը դժվարին պայքարում հաղթանակ տոնեց ֆրանսիացի Ժո-Վիլֆրեդ Ցոնգայի նկատմամբ: 2ժ 55ր տևած մրցավեճում իսպանացին հաղթանակի հասավ 6:2, 5:7, 6:4 հաշվով:
Քառորդ եզրափակիչ մյուս խաղը կայացավ Էնդի Մարեյի և Յանկո Տիպսարևիչի միջև: Հանդիպման սկզբնամասում Տիպսարևիչը ավելի լավ էր գործում և կարողացավ հաղթել առաջին սեթում, սակայն մյուս երկու սեթերում Մարեյն առավելության հասավ սերբ թենիսիստի նկատմամբ: Հանդիպումն ավարտվեց 4:6, 6:3, 6:4 հաշվով՝ շոտլանդացու հաղթանակով:
Հիշեցնենք, որ երկրորդ կիսաեզրափակիչում զույգ կկազմեն Նովակ Ջոկովիչ – Դավիդ Ֆերեր և Մերդի Ֆիշ – Խունա Մոնակո հանդիպումների հաղթողները:
