ՀՀ արդարադատության նախարար Սրբուհի Գալյանը հայտնել է, որ Հայաստանում ազատությունից զրկվածների թիվն այսօր հատել է 3000-ի շեմը։ ՀՀ արդարադատության նախարարությանը կից հասարակական խորհրդի նիստի ժամանակ Սրբուհի Գալյանը շեշտել է, որ դատապարտյալների թիվն ավելին է, քան կալանավորներինը:
«Բացարձակ թվերն աճում են, բայց իրականում վերջին շրջանում կալանավորումների թվի աճի միտումը պայմանավորված է ընտրական գործընթացներում ընտրակաշառքի գործերով: Հակակոռուպցիոն դատարանի ցուցանիշներն էլ են վկայում դրա մասին: Անցած տարվա նույն ժամանակահատվածում մեկ ամսվա կտրվածքով եղել է կալանավորման 5 դեպք, հիմա այդ դեպքերն անցնում են 100-ը»,- ասաց նա:
Արդարադատության նախարարի խոսքով՝ իրավապահ համակարգը ևս պետք է հավասարակշռված մոտեցում ունենա գործերի նկատմամբ, թե որ դեպքում է մարդուն տանում կալանքի, որ դեպքում՝ տնային կալանքի։
«Այսօր մեր համակարգում չգրված օրենքներ են գործում, որոնք օբյեկտիվ պատճառներ ունեն, բայց մենք փորձում ենք ամեն ինչ տանել դեպի ստանդարտ։ Երբ ուսումնասիրում էինք կալանքների ժամկետները, տեսանք, որ հինգ տարի և ավելի կալանք կրող անձինք ունենք, ինչը մեզ համար անընդունելի փաստ է, և այդ ամենը պայմանավորված է հիմնականում դատավորների հաճախակի փոփոխությամբ»,- նշել է նա։
Նախարարը նշեց նաև, որ քննարկումներ են ընթանում 1000 հոգու համար նախատեսված նոր քրեակատարողական հիմնարկ կառուցելու ուղղությամբ։ «Երկու տարբերակ ունենք, որոնք երկուսն էլ կապված են նոր քրեակատարողական հիմնարկ ունենալու հետ։ Մեկը պետություն-մասնավոր գործընկերության շրջանակում առաջարկի մասին է, մյուսը ստանդարտ գործընթացն է. այսինքն՝ պետությունն ինքը կառուցի, և հիմա ֆինանսների նախարարության հետ փնտրում ենք ձեռնտու տարբերակ»,- հավելել է նախարարը։
