Չեմպիոնների Լիգայի գավաթի 2011/12թթ. խաղարկության 1/8 եզրափակիչի պատասխան խաղում «Արսենալ»-ն «Էմիրեյթս» մարզադաշտում ընդունեց «Միլան»-ին:
Առաջին խաղում Ա Սերիայի գործող չեմպիոնը սեփական հարկի տակ 4:0 հաշվով ջախջախել էր լոնդոնյան ակումբին, և Արսեն Վենգերի սաների` հաջորդ փուլ դուրս գալն անհավանական էր թվում:
«Զինագործներ»-ն առաջին խաղակեսում գնդակահարեցին հյուրերի դարպասը` ընդմիջման գնալով 3:0 հաշվի պայմաններում: Գոլերի հեղինակ դարձան Լորան Կոսիելնին, Տոմաշ Ռոսիցկին ու Ռոբբին Վան Պերսին:
Թվում էր` «Արսենալ»-ի ֆուտբոլիստները երկրորդ խաղակեսում կկարողանան զարգացնել հաջողությունը, բայց «Միլան»-ն ուշադիր էր պաշտպանվում: Գոլային հիանալի պահ չիրացրեց Վան Պերսին, իսկ «Միլան»-ի կազմում մոտ տարածությունից անպաշտպան դարպասը չկարողացավ գրավել Անտոնիո Նոչերինոն:
Պորտուգալական «Բենֆիկա»-ն իր հերթին սեփական հարկի տակ 2:0 հաշվով պարտության մատնեց Սանկտ-Պետերբուրգի «Զենիթ»-ին և երկու խաղերի արդյունքում դուրս եկավ հաջորդ փուլ: Առաջին խաղն ավարտվել էր 3:2 հաշվով: Այսպիսով`
«Արսենալ» – «Միլան»` 3:0
1:0 Կոսիելնի (7’), 2:0 Ռոսիցկի (26’), 3:0 Վան Պերսի (43’)
«Բենֆիկա» – «Զենիթ»` 2:0
1:0 Պերեյրա (45+1’), 2:0 Օլիվեյրա (90+3’)
