Չեխիայի մայրաքաղաքում այսօր տեղի կունենա դեկտեմբերի 18-ին մահացած հանրապետության առաջին նախագահ Վացլավ Հավելի հուղարկավորության արարողությունը:
Ինչպես հաղորդում է BBC-ն, վերջին հրաժեշտի պաշտոնական արարողությունը տեղի կունենա Սուրբ Վիտի Մայր տաճարում: Այստեղ լռության րոպեից հետո 3 րոպե անընդմեջ կհնչեն քաղաքի բոլոր եկեղեցիների զանգերը: Հավելի հիշատակին հրանոթներից կտրվի 21 համազարկ: Այնուհետև պատարագ կմատուցվի:
Հուղարկավորության արարողությանը հրավիրված են շուրջ 1000 հյուրեր ամբողջ աշխարհից: Երկրի ԱԳՆ տվյալներով՝ Պրահա կժամանի 50 օտարերկրյա պատվիրակություն, այդ թվում՝ Ֆինլանդիայի, Ֆրանսիայի, Վրաստանի, Հունգարիայի, Ավստրիայի և Սլովակիայի նախագահները, ԱՄՆ նախկին պետքարտուղար Մադլեն Օլբրայթը, Մեծ Բրիտանիայի վարչապետ Դևիդ Քեմերոնը, Եվրահանձնաժողովի նախագահ Ժոզե Մանուել Բառոզուն, ԱՄՆ պետքարտուղար Հիլարի Քլինթոնը և նրա ամուսինը՝ Բիլ Քլինթոնը, Լեհաստանի նախկին նախագահ Լեխ Վալենսան:
Հավելը ծնվել է 1936 թ. հոկտեմբերի 5-ին Պրահայում, հարուստ ձեռնարկատիրոջ ընտանիքում: 1989-1992 թթ. զբաղեցրել է Չեխոսլովակիայի նախագահի պաշտոնը: 1993 թ. դարձել է Չեխիայի առաջին նախագահը և այդ պաշտոնում մնացել է մինչև 2003 թ.:
