Ադրբեջանական APA լրատվական գործակալության փոխանցմամբ՝ Իրանի նախկին արտգործնախարար Մանուչեհր Մոթաքին, ելույթ ունենալով Թեհրանի համալսարանում, կտրուկ քննադատության է ենթարկել Սիրիայի հանդեպ Թուրքիայի վարած քաղաքականությունը.
«Թուրքիայի ղեկավարությունը պետք է փոխի Սիրիայի հանդեպ իր դիրքորոշումը։ Վերջին 3 ամիսներին Թուրքիայի վարած սիրիական քաղաքականությունը սխալ է, և Թուրքիան պետք է վերանայի այն, քանի որ այդ քաղաքականությունը ոչ մի արդյունք չի տա։ Թուրքիան պետք է հասկանա, որ Բաշար Ասադի ռեժիմը չի ընկնի»։
Մոթաքին նաև կտրուկ քննադատել է Սաուդյան Արաբիային. «Վերջին շրջանում Սաուդյան Արաբիան միջամտում է արաբական երկրների ներքին գործերին։ Մենք տեսել ենք դրա վատ հետևանքներն Իրաքում։ Այժմ Սաուդյան Արաբիան օգնում է սիրիական ընդդիմությանը»։
Հիշեցնենք, որ Մոթաքին Իրանի արտգործնախարար է նշանակվել 2005 թվականին և պաշտոնավարել մինչև 2010 թվականի դեկտեմբերի 13-ը։
