Ադրբեջանական 1news.az-ի փոխանցմամբ՝ Ադրբեջանի արտգործնախարար Էլմար Մամեդյարովը դեկտեմբերի 6-7-ը Վիլնյուսում կայանալիք ԵԱՀԿ անդամ երկրների արտգործնախարարների խորհրդի 18-րդ նիստի շրջանակներում հանդիպելու է ԵԱՀԿ Մինսկի խմբի համանախագահների հետ։ Այս մասին հայտարարել է Ադրբեջանի ԱԳՆ-ի պաշտոնական ներկայացուցիչ Էլման Աբդուլաևը։
Նիստին մասնակցելու են ԵԱՀԿ 56 անդամ երկրների արտգործնախարարները, ինչպես նաև Հյուսիսային Աֆրիկայի ու Ասիայի գծով կազմակերպության 12 գործընկեր երկրները։ ԵՄ արտաքին հարաբերությունների և անվտանգության քաղաքականության հարցերով գերագույն հանձնակատար Քեթրին Էշթոնը նույնպես մասնակցելու է նիստին։
Հիշեցնենք, որ այսօր ադրբեջանական APA լրատվական գործակալությունը հայտնել էր, որ Հայաստանի ու Ադրբեջանի արտգործնախարարներ Էդվարդ Նալբանդյանն ու Էլմար Մամեդյարովը պլանավորել են դեկտեմբերի 6-7-ը հանդիպել Վիլնյուսում։ Չէր բացառվել, որ նրանց վիլնյուսյան հանդիպումը կարող է անցկացվել 3+2 ձևաչափով՝ ԵԱՀԿ Մինսկի խմբի համանախագահող երկրների արտգործնախարարների մասնակցությամբ։
