Soccer.ru-ի փոխանցմամբ՝ «Բարսելոնա»-ի արգենտինացի հարձակվող Լիոնել Մեսսին խոստովանել է, որ պլանավորել է գերազանցել Սեզար Ռոդրիգեսի ռեկորդը, որը 1939-1955 թվականներին հանդես է եկել «Բարսելոնա»ի կազմում և խփել 235 գնդակ։ Մադրիդի «Ատլետիկո»-ի դեմ խաղում հեթտրիկից հետո Մեսին «Բարսելոնա»-ի կազմում իր խփած գոլերի քանակը հասցրեց 192-ի։
Մեսսին նշել է. «Ես բավական հանգիստ եմ վերաբերվում այդ ռեկորդին, թեև, բնականաբար, ցանկանում եմ գերազանցել այն։ Այդ ռեկորդը պահպանվում է արդեն բավական երկար ժամանակ։ Հուսով եմ հաղթահարել այդ նշաձողը։ Ես ցանկանում եմ հետագայում նույնպես «Բարսելոնա»-ի կազմում դառնալ ռեկորդների հեղինակ։ Չնայած դրան՝ ինձ համար առաջին տեղում թիմի շահերն են։ Գլխավորը նոր տիտղոսներ նվաճելն է»։
Հիշեցնենք, որ Մեսսին «Բարսելոնա»-ի առաջին թիմում է հանդես գալիս 2004/05 մրցաշրջանից և անցկացրած 278 հանդիպումներում խփել է 192 գոլ։ 2004/05 – 9 խաղ, 1 գոլ, 2005/06 – 25 խաղ, 8 գոլ, 2006/07 – 36 խաղ, 17 գոլ, 2007/08 – 40 խաղ, 16 գոլ, 2008/09 – 51 խաղ, 38 գոլ, 2009/10 – 53 խաղ, 47 գոլ, 2010/01 – 55 խաղ, 53 գոլ, 2011/12 (ընթացքի մեջ է) – 9 խաղ, 12 գոլ։
Իսպանիայի առաջնության 182 խաղում Մեսսին խփել է 127 գոլ, Իսպանիայի գավաթի 26 խաղում՝ 17 գոլ, եվրագավաթային 57 հանդիպումներում՝ 37 գոլ, այլ մրցաշարերում՝ 12 խաղ, 11 գոլ։
Ի դեպ, Մեսսին նախորդ տարի դարձել է «Բարսելոնա»-ի եվրագավաթային պատմության մեջ գլխավոր ռմբարկուն՝ գերազանցելով Ռիվալդոյի ռեկորդը, որը «Բարսելոնա»-ի կազմում եվրագավաթային հանդիպումներում խփել է 25 գնդակ։
