Կիրակի հայտնի է դարձել, որ Իրանի Ռազմածովային ուժերը նոր թեւավոր հրթիռներ են ստացել՝ Talaieh եւ Nasir, որոնց հեռահարությունը հասնում է համապատասխանաբար 1000 եւ 100 կլիոմետրի: Այդ առթիվ Իսլամական հեղափոխության պահապանների կորպուսի բրիգադային գեներալ Մոհամեդ Ռզա Նաքդին հայտարարել է, որ Իսրայելը եւ Արեւմուտքը կարող են արգելափակվել Միջերկրական ծովում, քանի որ «Ջիբրելթարը կփակվի: Եմենի հուսիները մի քանի հարձակում են գործել Կարմիր ծովում բեռնափոխադրումներ իրականացնող նավերի դեմ: Միացյալ Նահանգները հայտարարել են Կարմիր ծովում նավարկության անվտանգության ուժերի կազմավորման մասին:
Դեկտեմբերի 20-ին Ադրբեջանի ԱԳՆ-ն թույլ տվեց տեղեկատվական արտառոց արտահոսք. Բաքվում Իսլամական հանրապետության դեսպանի եւ փոխարտգործնախարար Շարիֆովի հանդիպման մասին պաշտոնական հաղորդագրության տեքստում ընդգծված էր, որ կողմերը քննարկել են տարբեր, այդ թվում՝ ռազմական ոլորտում համագործակցության եւ տրանսպորտային ու էներգետիկ համատեղ ծրագրերի իրականացման հարցերը: Մինչ այդ Բաքու էր այցելել Իրանի Ռազմածովային ուժերի հրամանատարությունը:
Անդրադառնալով Կարմիր ծովում իրավիճակի եւ Իրանի ՌԾՈՒ նավերը թեւավոր հրթիռներով զինելու թեմային, Բաքվի իշխանամերձ լրատվամիջոցն արեւմտյան երկրների արձագանքներից առանձնացրել է Միացյալ թագավորության արտաքին գործերի նախարար, նախկին վարչապետ Քեմերոնի բավական կոշտ հայտարարությանը: Քեմերոնը գնահատել է համաշխարհային անվտանգային իրավիճակը եւ ընդգծել, որ այդ բարդ պատկերում Իրանը «ծայրահեղ կործանարար ազդեցություն է գործում տարածաշրջանում եւ աշխարհում: Նա կոչ է արել արեւմտյան երկրներին եւ դաշնակիցներին՝ ստեղծելու Իրանին «զսպող միջոցների ուժեղ գործիքակազմ:
Տպավորություն է, որ Իրանի հետ ռազմական համագործակցության մասին Բաքվի բացախոսությունները հասցեագրված են Արեւմուտքին: Ալիեւը դեկտեմբերի 6-ին հայտարարել է, որ եթե Միացյալ Նահանգների համար Իրան-Ադրբեջան կոմունիկացիոն ծրագրերը խնդրահարույց են, ապա Վաշինգտոնը կարող է գործի դնել Հայաստանի նկատմամբ ազդեցությունը, որպեսզի «Զանգեզուրի միջանցքը բացվի: Ըստ երեւույթին, Իրանի նկատմամբ զսպող գործիքակազմեր ստեղծելու մասին Մեծ Բրիտանիայի արտգործնախարարի հայտարարությունը Բաքվում գնահատում են որպես Ալիեւի դիվանագիտական« խաղի կամ նաեւ դրա պատասխան:
Ալիեւին կհաջողվի՞ համադրել Իրանի հետ համագործակցությունը Եվրամիության էներգետիկ շուկայում ազդեցիկ ներկայություն ապահովելու հավակնոտ ծրագրին: Ադրբեջանի նավթագազային համակարգի վերածննդի կնքահայրը BP-ն է: Լոնդոնը ծրագրում է 2024-ին անցկացնել վարչապետ Սունակի եւ Կենտրոնական Ասիայի երկրների առաջնորդների գագաթնաժողով: Դեպի Կենտրոնական Ասիա եւ հակառակ ուղղությամբ կոմունիկացիաների հանգուցակետը Բաքուն է: Ընդսմին, 2024-ին լրանում է Բաքու-Ջեյհան նավթատարի համաձայնագրի 30-ամյակը, իսկ Ադրբեջանը՝ հյուրընկալում է կլիմայի հարցերով COP29 համաշխարհային խորհրդաժողովը:
Մեծ Բրիտանիայի արտգործնախարարի պաշտոնում նախկին վարչապետ Քեմերոնի նշանակումը արեւմտյան մամուլում գնահատվել է որպես «Ասիա վերադառնալու Լոնդոնի ծրագրի անոնս: Դեկտեմբերին Լոնդոն է այցելել Անվտանգության խորհրդի քարտուղար Արմեն Գրիգորյանը, որին հաջորդել է Իլհամ Ալիեւի արտաքին քաղաքականության հարցերով օգնականի ուղեւորությունը: Նրանք բանակցություններ են վարել Մեծ Բրիտանիայի վարչապետի գլխավոր խորհրդական Թիմ Բարոունի հետ: Կասպից ավազանում Լոնդոնը նոր էներգետիկ նախագի՞ծ է մշակում: Դեկտեմբերի 6-ին Իլհամ Ալիեւը փոխպետքարտուղար Օ՛Բրայանին հավաստիացրել է, որ դեմ չէ տարածաշրջանում էներգետիկ նոր նախագծերին: Հայաստանը որպես Կասպից ավազանից էներգակիրների արտահանման տրանզիտային երկիր է դիտարկվում է:
