Sprts.ru-ի փոխանցմամբ՝ երեկ տեղի է ունեցել Թուրինի «Յուվենտուս»-ի նոր մարզադաշտի հանդիսավոր բացումը։ Նրա անվանակոչման հարցը դեռ չի ստացել իր լուծումը՝ թեև 2008 թվականին Sportfive ընկերությունը գնել է մարզադաշտի անվանակոչման իրավունքը։ Ներկայումս մարզադաշտը ժամանակավորապես կրում է «Յուվենտուս Սթադիում» անվանումը։
Մարզադաշտը կառուցվել է հին («Դելլե Ալպի») մարզադաշտի վայրում և տեղավորում է 41,000 հանդիսական։ Երեկ այնտեղ անցկացվել է առաջին հանդիպումը. «Յուվենտուս»-ն ընդունել է անգլիական 3-րդ դիվիզիոնը ներկայացնող «Նոթս Քաունթի»-ին և հանդիպումն ավարտել է ոչ ոքի (1։1)։ Նոր մարզադաշտում «Յուվենտուս»-ի առաջին գոլի հեղինակ է դարձել իտալացի հարձակվող Լուկա Տոնին։
Նոր մարզադաշտում առաջին տնային հանդիպման համար մրցակցի ընտրության ժամանակ հաշվի է առնվել այն հանգամանքը, որ 1903 թվականին «Յուվենտուս»-ը հենց «Նոթս Քաունթի»-ից է փոխառել սև-սպիտակ գույները։
«Յուվենտուս»-ը դարձավ առաջին իտալական ակումբը, որը կառուցեց ու բացեց իր սեփական մարզադաշտը։ Մարզադաշտի կառուցումը տևել է 2.5 տարի, այն արժեցել է 105 միլիոն եվրո։
Նոր մարզադաշտում առաջին պաշտոնական հանդիպումը տեղի է ունենալու սեպտեմբերի 11-ին։ Այդ օրը «Յուվենտուս»-ն Իտալիայի առաջնության 2-րդ տուրի (1-ին տուրը հետաձգվել է ֆուտբոլիստների գործադուլի պատճառով) շրջանակներում հյուրընկալելու է «Պարմա»-ին։
