Առաջարկվող նախագիծը վերաբերում էր նրան, որ առանձնահատուկ համարանիշներ սահմանվեն, օրինակ 5 հատ զրո և դրանք աճուրդային կարգով տրամադրվեն քաղաքացիներին. Սա իհարկե, բյուջե լրացուցիչ գումարներ կբերեր, բայց մենք ավելի խորը ուսումնասիրություններ ենք արել և պարզել, որ այս տարիների ընթացքում ինչքան մեծ պահանջարկ ունեցող համարանիշներ են հանվել վաճառքի, դրանց մի մասը դեռևս չի վաճառվել: Այս մասին «Առաջին լրատվական»-ի հետ զրույցում նշեց ԱԺ «Քաղաքացիական պայմանագիր» խմբակցության պատգամավոր Արմեն Խաչատրյանը՝ անդրադառնալով նրան, որ այդ նախագիծը ԱԺ համապատասխան հանձնաժողովում դրական եզրակացություն չստացավ:
«Մենք ուզում ենք նաև դրնց հարցը լուծենք, ինչ-որ նոր կանոնակարգ մտցնենք, որ քաղաքացիները հնարավորություն ունենան դրանք գնելու, ինչը լրացուցիչ եկամուտներ կբերի բյուջե: Բացի այդ, օրենքը ենթադրում էր, որ օրենքը պետք է էլեկտրոնային չլիներ, ինչը մեզ համար անընդունելի է: Եթե աճուրդ է, պետք է լինի էլեկտրոնային տարբերակով: Այս նկատառումներից ելնելով մենք կառավարության ներկայացուցչին առաջարկեցինք նախագիծը հետ վերցնել երկու ամիս ժամանակով»,-ընդգծեց Արմեն Խաչատրյանը:
