Ռուսաստանի մարմնամարզության ազգային հավաքականի գլխավոր մարզիչ Վալենտինա Ռոդիոնենկոն այս տարվա ապրիլի 16-ին մեկնաբանել էր մամուլում հայտնված այն տեղեկությունը, թե ռուսաստանցի մարզիկ, օլիմպիական չեմպիոն Արթուր Դալալոյանը հրաժարվել է հանդես գալ Հայաստանի հավաքականում։ «Դալալոյանը հրաժարվե՞լ է տեղափոխվել Հայաստանի հավաքական։ Դա ճիշտ է։ Այո, նրան առաջարկել են, բայց Արթուրը շատ հստակ հասկացրեց, թե որտեղ է և ում հետ։ Դալալոյանը ճիշտ է վարվել, նա նորմալ, բարեկիրթ անձնավորություն է, և նա չէր կարող վերցնել և այլ կերպ վարվել»,- ասել էր Ռոդիոնենկոն։ Ի պատասխան լուրերի, ըստ որոնց Հայաստանի ազգային օլիմպիական կոմիտեն առաջարկ է արել Դալալոյանին և գեղասահորդ Արթուր Դանիելյանին հանդես գալ Հայաստանի հավաքականում, ՀԱՕԿ գլխավոր քարտուղար Հրաչյա Ռոստոմյանը հայտարարել է, որ այդ լուրերը կատարյալ դատարկաբանություն են: «Այդ լուրերը անհեթեթություն են ու կատարյալ դատարկաբանություն: Սրան, նույնիսկ, անդրադառնալ պետք չէր, սակայն թյուրըմբռնումից խուսափելու համար հարկ եմ համարում բացատրել: Առաջին հերթին՝ ՀԱՕԿ-ը իրավական տեսանկյունից իրավունք չունի մարզիկներ հրավիրել Հայաստան: Երկրորդ՝ մեր մարմնամարզիկները տարիներ շարունակ փայլել են մոլորակի ամենատարբեր հարթակներում: Նրանք աշխարհում լավագույններից են:
Օրեր առաջ էլ Արթուր Դավթյանի պատվին Թուրքիայում հնչեց մեր օրհներգը, նույնն էլ՝ երիտասարդների Աշխարհի առաջնությունում եղավ: Հանուն ինչի՞ ՀԱՕԿ-ը պետք է հետաքրքրված լինի այլ երկիր ներկայացնող մարզիկներով: Խորհուրդ եմ տալիս շարունակել հպարտանալ մեր երկրի պատիվը բարձր պահող մարզիկներով և չտարածել ապատեղեկատվություն»,- նշել էր Ռոստոմյանը: Չմոռանանք, որ Ուկրաինայի նկատմամբ ցուցաբերած ռազմական ագրեսիայի հետևանքով Միջազգային օլիմպիական կոմիտեն ռուսաստանցի մարզիկներին զրկել է իր հովանու ներքո անցկացվող մրցաշարերին մասնակցելու իրավունքից։ Դալալոյանի պես մարզիկին Հայաստանի օլիմպիական հավաքական բերելը ինչ խոսքը մեծ ձեռքբերում կլիներ բայց․․․։ Վերջին զագրացումները խոսում են այն մասին, որ այս մարզիկը ելույթ չի ունենա Հայաստանի դրոշի ներքո։ Ինչև Ռիո-2016-ի Օլիմպիական խաղերի կրկնակի չեմպիոն Յանա Եգորյանը ապրիլի 17-ին դարձավ սուսերամարտի Ռուսաստանի չեմպիոն:Թրամարտի մրցման եզրափակիչում 29-ամյա մարզուհին 15-12 հաշվով առավելության էր հասել Ալինա Միխայլովայի նկատմամբ: Հիշեցնենք, որ միջազգային կարգի սպորտի վարպետ Յանա Եգորյանը կարիերայում երրորդ անգամ նվաճեց Ռուսաստանի չեմպիոնի կոչումը: «Յուրաքնչյուր մարզիկ ունի նպատակ և դա բնական է։ Յուրաքանչյուր մարզիկի գլխավոր նպատակը սակայն Օլիմպիական խաղերն են։ Եկող տարի կսկսվի 2024 թվականի Օլիմպիադայի որակավորման փուլը։
Բնական է, որ առանց որակավորման հնարավոր չի լինի ելույթ ունենալ Փարիզում։ Եթե ռուսաստանցի մարզիկներին թույլ չտան մասնակցել որակավորման մրցաշարերին, ստիպված եմ լինելու ամուսնուս հետ լուրջ խոսակցություն ունենալ։ Այո, սուսերամարտով կարող եմ զբաղվել Ռուսաստանում, բայց որքան։ Մի տարի, երկու տարի․․․։ Եթե չիլինի հեռանկար ստիպված եմ լինելու այլ զբաղմունք գտնել»,- ավելի վաղ ասել էր Եգորյանը: Ռուսաստանի առաջնությանը մասնակցելն ու չեմպիոն դառնալը Եգորյանի կողմից ըստ էության հայտ է մասնակցելու Օլիմպիական խաղերին։ Այս պահին քիչ հավանական է, որ ՄՕԿ-ը վերանայի որոշումը ռուսաստանցի մարզիկների վերաբերյալ։
Համենայն դեպս, Փարիզի Օլիմպիական խաղերում Ռուսաստանի հավաքականի մասնակցությունը կարելի է բացառել։ Ստեղծված իրավիճակում Յանա Եգորյանը ունի Փարիզ մեկնելու մեկ ճանապարհ։ Դա է ընդունել Հայաստանի քաղաքացիություն և ելույթ ունենալ Հայաստանի դրոշի ներքո։ Սա Եգորյանի համար միակ հեռանկարն ու ոսկե հնարավորությունն է։ Թե ինչ որոշում կկայացնի Եգորյանն և ՀԱՕԿ-ը այս պահին դժվար է ասել։ Համենայն դեպս հայազգի օլիմպիական չեմպիոնը քիչ ժամանակ ունի, քանզի իրավական գործըթնացից զատ անհրաժեշտ է մասնակցել նաև օլիմպիական խաղերի վարկենիշային մրցաշարերին։
