Թունիսում անցկացված Ֆրանկոֆոնիայի միջազգային կազմակերպության 18-րդ գագաթնաժողովին Ֆրանսիան, Կանադան, Ուկրաինան, Հունաստանը, Կատարը և 50-ից ավելի այլ երկրներ ընդունել են հայանպաստ բանաձև՝ դատապարտելով ադրբեջանական ագրեսիան՝ իրենց աջակցությունն ու համերաշխությունն են հայտնելով ադրբեջանական ագրեսիային ենթարկված Հայաստանին։
Հայանպաստ այդ բանաձևով Կազմակերպությունը համերաշխությունն է հայտնել Հայաստանին և խորին մտահոգություն հայտնել վերջերս Ադրբեջանի կողմից Հայաստանի տարածքային ամբողջականության և ինքնիշխանության դեմ ագրեսիայի՝ հատկապես դրա արդյունքում միջազգային իրավունքի, տարածքային ամբողջականության և միջազգային մարդասիրական իրավունքի խախտումների առնչությամբ։ 50-ից ավել անդամ երկրներ ունեցող կազմակերպությունը կոչ է արել կողմերին միջազգային գործընկերների հետ համատեղ, խնդիրների բանակցված, խաղաղ և տևական կարգավորման ուղղությամբ առավելագույն ջանքերը գործադրել՝ հարգելով միջազգային իրավունքի, ներառյալ՝ տարածքային ամբողջականության և միջազգային սահմանների անձեռնմխելիության սկզբունքները, համաձայն ՄԱԿ-ի կանոնադրության՝ միաժամանակ կոչ անելով խստորեն հարգել հրադադարը։ Բանաձևով կոչ է արվել իրականացնել 2020թ․ նոյեմբերի 9-ի Եռակողմ հայտարարությունը և ողջունել գործադրվող ջանքերը՝ Լեռնային Ղարաբաղի հակամարտության խաղաղ ու արդարացի կարգավորման ուղղությամբ։
Բանաձևում անդրադարձ կա նաև Ադրբեջանում պահվող հայ ռազմագերիների վերաբերյալ։
Առաջին հայացքից պարզ թվացող բանաձևը իրականում այնքան էլ հեշտ չի ընկալվել։ Ադրբեջանական լոբբին փորձել է ամեն կերպ խոչընդոտել հայանպաստ բանաձևի ընդունումը և իր յուրային երկրների միջոցով հասնել նրան, որ չեզոք բանաձև ընդունվի, և հայանպաստ կետերը դուրս մղվեն դրանից։ Սակայն, հայկական դիվանագիտությանը հաջողվել է հասնել խիստ հայանպաստ բանաձևի ընդունմանը՝ ըստ էության հերթական անգամ միջազգային հանրության առաջ ցույց տալով Ադրբեջանի իրական դեմքը՝ 50-ից ավելի երկրների դրդելով բանաձևի տեսքով բարձրաձայնել այդ մասին։
