Սիրիայի կենտրոնական բանկի ղեկավար Ադիբ Մաալեհը հայտարարել է, որ երկրում տնտեսական իրավիճակը սրընթաց վատանում է, որի պատճառով Սիրիայի բնակիչները պետք է «ձգեն գոտիները»: Այս մասին հաղորդում է France Presse գործակալությունը: «Հիմնական հարվածն իր վրա է վերցրել զբոսաշրջության բնագավառը, որտեղ եկամուտներն ընկել են 90%-ով: Տրանսպորտը, ներքին առևտուրը, արդյունաբերությունը նույնպես գտնվում են օրեցօր աճող ճնշման տակ: Մենք հայտնվել ենք գործազրկության և աղքատության շեմին»,- ասել է բանկի ղեկավարը:
Այս իրավիճակի համար նա պատասխանատվությունը դրել է արևմտյան երկրների վրա, որոնք պատժամիջոցներ են կիրառում Սիրիայի և նրա ղեկավարների նկատմամբ: Մաալեհի խոսքերով, պատժամիջոցների հետևանքով առաջացած տնտեսական խառնաշփոթի պատճառով տուժում է քիչ ապահովված խավը: Ռեժիմը, ըստ նրա, ոչ մի բարդություններ չի զգում: Միևնույն ժամանակ, նրա խոսքերով, երկիրը վերջին ամիսների ընթացքում ստիպված է եղել ծախսել հավելյալ 2 մլրդ դոլար հատուկ պահուստային ֆոնդից, որն ստեղծվել է երկրի տարադրամը կայուն պահելու համար: Բացի այդ, Սիրիայի ոսկու պաշարները նվազել են 800 մլն դոլարով և հիմա կազմում են 17,7 մլրդ դոլար:
Մաալեհը նաև զգուշացրել է ԵՄ անդամ երկրներին, որ եթե նրանք շարունակեն պատժամիջոցներ կիրառել Սիրիայի դեմ, ապա Դամասկոսը կդիմի այլ երկրների օգնությանը: «Մենք կարող ենք դժվարություններից դուրս գալ Չինաստանի օգնությամբ: Եթե եվրոպացիները գնան, նրանց տեղը հեշտությամբ կզբաղեցնի ՉԺՀ-ն: Մեզ կարող է օգնել նաև Ռուսաստանը», – մանրամասնել է բանկի ղեկավարը:
Ապստամբությունը, որը սկիզբ է առել 2011 թ.-ի մարտին, կտրուկ ազդել է դեպի Սիրիա զբոսաշրջիկների այցելությունների վրա: Անկարգությունների հետևանքով տուժել է արդյունաբերությունը, առևտուրը և սպասարկման ոլորտը: Սիրիացիները սկսել են զանգվածաբար գումարներ հանել իրենց բանկային հաշիվներից, ինչը բացասաբար է ազդել բանկային համակարգի վրա:
Բացի այդ, 2011 թ.-ի բյուջեն կազմվել է առանց ռազմական զանգվածային գործողությունների համար ծախսվող գումարները հաշվի առնելու: