Ադրբեջանական իշխանությունների կողմից հովանավորվող հայատյացությունն ամբողջ աշխարհում ապրող երկու ժողովուրդներին թշնամանքի մեջ պահելու նպատակային քաղաքականություն է, որը վտանգում է նաև տվյալ երկրների կայունությունն ու մարդու իրավունքների համակարգը։
Այս մասին ասել է ՀՀ մարդու իրավունքների պաշտպան Արման Թաթոյանը ԱՄՆ-ում հայկական լրատվամիջոցների հետ մամուլի ասուլիսի ժամանակ։
«Ադրբեջանական այս թշնամանքի, ատելության քաղաքականությունը, որն ունի ինստիտուցիոնալ, խորքային արմատներ, վտանգավոր է նաև այլ երկրների համար, այդ թվում՝ ԱՄՆ-ի: Ասեմ, թե ինչով. այս քաղաքականությունը թշնամանքի մեջ է պահում երկու ժողովուրդներին՝ ամբողջ աշխարհում: Վտանգներ կան հատկապես այն երկրներում, որտեղ հայերն ու ադրբեջանցիներն ապրում են համատեղ, կողք-կողքի: Ակնհայտ է, որ ադրբեջանական իշխանություններն իրենց վարած այս քաղաքականությամբ հանգիստ կարող են տվյալ երկրների կայունությունը խաթարել՝ հիմք դնելով թշնամանքի ու ատելության շարժառիթով կատարվող հանցագործություններին: Այսկերպ Սան Ֆրանցիսկոյում վանդալիզմի են ենթարկվել հայկական եկեղեցին, դպրոցը, իմ աչքով տեսա, թե ինչպես էին դպրոցի վրա նույնիսկ կրակել: Նույն պատկերն ունենք նաև այլ երկրներում՝ Ֆրանսիայում, Ռուսաստանում, Գերմանիայում»,- նշել է Թաթոյանը:
Ամերիկայի Հայ դատի հանձնախմբի հրավերով այս օրերին ԱՄՆ-ում գտնվող ՀՀ մարդու իրավունքների պաշտպանն ընդգծել է՝ հայասպանությունը, խախտումները Ադրբեջանի իշխանությունների կողմից խրախուսվում են բարձր մակարդակով:
«Այս ամենը չի սկսվել վերջին պատերազմով, այն շատ ավելի խորը արմատներ ունի: Դրա օրինակները բազմաթիվ են»,- շեշտել է նա:
Անդրադառնալով 2020 թվականի պատերազմին և դրա հետևանքներին՝ պաշտպանը նկատել է՝ 2020 թվականի նոյեմբերի 9-ից հետո մարտահրավերները չեն դադարել.
«Սա ոչ այլ ինչ է, քան՝ շարունակվող պատերազմ: Պատերազմը ոչ միայն ընթացքում արհավիրքներ բերեց, այլ նաև երկարաժամկետ հետևանքներ թողեց: Հայաստանում, Արցախում և ընդհանրապես՝ աշխարհում ապրող մեր ժողովուրդն այդ հետևանքները հենց հիմա էլ զգում է: Սյունիքում, Գեղարքունիքում՝ Հայաստանի գյուղերի անմիջական հարևանությամբ ու ճանապարհներին ներկայում հայտնվել են ադրբեջանական դրոշներ, ցուցանակներ ու անցակետեր»:
Արման Թաթոյանն ընդգծել է՝ այդ երկրի (Ադրբեջանի) իշխանությունները պետք է ենթարկվեն պատասխանատվության՝ լինի քաղաքական, թե քրեական: Խախտումների աղբյուրը, հիմքը միայն այդ կերպ կարող է վերացվել:
