2021 թվականի հունվարի 1-ից Հայաստան այլևս չեն ներմուծվում թուրքական ապրանքներ, այդ թվում՝ թուրքական լոլիկ։ Դրա փոխարեն, ըստ մամուլի հրապարակումների, հանրապետություն ակտիվորեն սկսել են լոլիկ մատակարարել Իրանից։ Իրանական լոլիկը բավականին մատչելի է. 1 կիլոգրամն արժե մոտ 200 դրամ, ինչը մի քանի անգամ ավելի մատչելի է հայկական ջերմոցային լոլիկից։ Մաքսատուրքերն ու տեղափոխման ծախսերը վճարելով՝ լոլիկը մեծածախ վաճառքի շուկաներում մոտ 400 դրամ է։ Մինչդեռ հայկական ջերմոցային լոլիկի անգամ ինքնարժեքը դրանից բարձր է՝ հաշվի առնելով գազի և այլ ծախսերը։
Պաշտոնական տվյալներով՝ հունվար-փետրվարին հանրապետություն շուրջ 200 տոննա լոլիկ է ներկրվել։
«Ագրոգյուղացիական միավորում» ՀԿ նախագահ Հրաչ Բերբերյանն «Առաջին լրատվական»-ի հետ զրույցում ասաց, որ վստահաբար չի կարող պնդել, որ Իրանից արդեն լոլիկ է ներկրվում Հայաստան, բայց կարող է ասել, որ թուրքական լոլիկը շարունակում է ներկրվել, ու խանութներում կարելի է գտնել թուրքական լոլիկ։ «Թուրքիայից էլ է գալիս լոլիկ։ Էդ որ ասում են՝ սահմանը փակ է և այլն, էդքան էլ փակ չի։ Ես խանութներում տեսել եմ թուրքական լոլիկ։ Արկղից ակնհայտ է դառնում, որ դա թուրքական է։ Պարսկաստանից էլ կարող է գալ։ Այն տարածքներում, որտեղ հնարավոր է առանց ջեռուցման լոլիկ աճեցնել, այդ արտադրանքը շատ էժան է։ Իսկ մեր լոլիկի արտադրանքի ինքնարժեքի 70 տոկոսը կազմում են միայն էներգակիրները»,- ասաց Բերբերյանը՝ հավելելով, որ այս պայմաններում մեր տեղական արտադրանքը չի կարող մրցակցել ներկրվող լոլիկի հետ, որը աճեցվել է առանց ջեռուցման։
Բերբերյանի խոսքով՝ ստեղծված իրավիճակում մեր տեղական արտադրողը կրկին փաստի առաջ է կանգնելու, և միակ լուծումն այն է, որ նրանք վերակազմակերպեն իրենց գործունեությունը, սկսեն արտադրել այն, ինչի պահանջարկը շուկայում շատ կա։ «Ես ինքս ի սկզբանե դեմ եմ եղել Հայաստանում թանկարժեք ջերմոցների կառուցմանը։ Բայց հետո քննարկումների ժամանակ համոզեցին, որ պարտադիր չէ այդ ջերմոցներում լոլիկ աճեցնեն. կարող են ծաղիկ աճեցնել, քանի որ ծաղկի շուկան շատ լավ շուկա է։ Կամ կարող են այլ բանջարեղեն աճեցնել, և լոլիկն ու վարունգը թողնեն ներկրման համար։ Մեր ջերմոցատերերը պարզապես համոզված էին, որ շուկայի հարց կլուծվի, իսկ փոքր ջերմոցատերերը պետք է մտածեն անպես անել, այն կուլտուրաները աճեցնել, որոնք այսօր շուկայում տեղ ունեն, քանի որ նրանք այսպես թե այնպես չեն կարող մրցակցել ներկրվող էժան լոլիկի կամ այլ բանջարեղենի հետ։ Ես ջերմոցատերեր գիտեմ, որ նախկինում լոլիկ էին մշակում, հիմա արդեն սկսել են կարտոֆիլ աճեցնել։ Ժամանակի ընթացքում պետք է վերադասավորեն իրենց գործունեությունը, տեսնեն՝ ինչի կարիք կա, ու սկսեն դա արտադրել։ Սա միակ ելքն է, որպեսզի լուրջ վնասներ չկրեն»,- ասաց Բերբերյանը։
Մեր զրուցակցի խոսքով՝ որպեսզի տնտեսվարողները ճիշտ կողմնորոշվեն և հասկանան, թե շուկան ինչի կարիք ունի, ինչ արտադրանք թողարկեն, դրա համար հարկավոր է խորհրդատվություն, որը գյուղացին չի ստանում գյուղատնտեսության նախարարության փակվելու պատճառով։ «Գյուղացին չգիտի՝ ինչ մշակի, ինչ ցանի, ինչի կարիք ավելի շատ կա, ինչը կարող է արագ իրացնել։ Սա լուրջ խնդիր է, գյուղացին խորհրդատվություն պետք է ստանա, բայց այդ թերությունը, կարծում եմ, հնարավոր է ուղղել»,- եզրափակեց Բերբերյանը։