Հայաստանի վարչապետը, փոխվարչապետ Մհեր Գրիգորյանն ու արտգործնախարար Արարատ Միրզոյանը Թեհրանում մասնակցում են Իրանի նախագահ Իբրահիմ Ռեյիսիի եւ Իրանի արտգործնախարար Ամիր Աբդոլահիանի թաղման արարողությանը: Հայաստանն այդ արարողությանը մասնակցում է փաստորեն բարձր եւ ներկայացուչական մակարդակով, ինչը անկասկած թե հարգանքի տուրք է ողբերգության զոհերի հիշատակին, թե նաեւ Իրանի պետականությանը՝ որպես Հայաստանի համար ռազմավարական նշանակության գործընկեր ու բարեկամ պետության:
Ինչպես օրեր առաջ հրապարակված հոդվածում նկատել էի, ողբերգության հետեւանքով Իրանի ներքաղաքական կյանքում եւ Իրանի շուրջ հնարավոր որոշակի «տոււրբուլենտության» պայմաններում շատ կարեւոր է, որպեսզի պաշտոնական Երեւանը ձեռքը մշտապես պահի իրավիճակի զարկերակին, մի կողմից դրսեւորելով Իրանի՝ որպես Հայաստանի համար կարեւորագույն գործընկեր պետության հանդեպ իր հաստատուն վերաբերմունքը, մյուս կողմից նաեւ առավելագույնն անելով ընթացիկ աշխատանքային մակարդակում հաղորդակցության ապահովման եւ հայ-իրանական հարաբերությունը այս շրջափուլում հանգամանալից ուշադրությամբ ուղեկցելու համար:
Այդ իմաստով կարեւոր էի համարել, որ Երեւանը Իրանի նախագահի թաղման արարողությանը ներկա գտնվի թե վարչապետի, թե արտաքին գործերի նախարարի մասնակցությամբ: Փաստացի, Երեւանի ներկայությունն առավել ընդգրկուն է՝ նաեւ փոխվարչապետի մասնակցությամբ, ինչը անկասկած առավել ընդգծում է Թեհրանի հետ հարաբերության նշանակալիությունը: Իրանի արտաքին քաղաքականությունը փոփոխման ենթակա չէ, չնայած նախագահի հետ պատահած աղետին, նախօրեին հայտարարել էր Մոսկվայում Իրանի դեսպանը, ասելով, որ Իրանի արտաքին քաղաքականությունը սահմանվում է Գերագույն հոգեւոր առաջնորդի մակարդակով:
Այդուհանդերձ, չնայած դրան, ի վերջո պետական քաղաքականությունը բազմաստիճան երեւույթ է, առավել եւս խոշոր տերությունների պարագայում, հետեւաբար դրա մարտավարական ընթացքը մեծապես կախված է տվյալ երկրում պետական քաղաքականության ինստիտուցիոնալ կառուցվածքից: Հետեւաբար, հատկապես արտառոց իրավիճակներում շատ կարեւոր է առանցքային մակարդակներում հաղորդակցության անհրաժեշտ աստիճանի ապահովումը, երկարաժամկետ հեռանկարում բացեր չունենալու համար: