1998թ. այս օրը՝ փետրվարի 3-ին, ՀՀ առաջին նախագահ Լևոն Տեր-Պետրոսյանը հրաժարական տվեց: «Առաջին լրատվական»-ի հետ զրույցում անդրադառնալով հարցին, թե որքանով է այդ օրը պահել իր պատմականությունը կամ հիշարժանությունը, «Ժառանգություն» կուսակցության վարչության նախագահ Նարինե Դիլբարյանը կարծիք հայտնեց, որ մեր պետության հետագա ամբողջ ընթացքը ապացուցեց, որ դա քաղաքական քայլ էր, որն ավանդույթ չդարձավ: «Տեր-Պետրոսյանը հստակ ներկայացրեց իր ծրագիրն ու պատկերացումները՝ բոլոր հիմնավորումներվ և չստացավ աջակցություն, որից հետո հրաժարական տվեց: Կարծում եմ՝ իրեն հարգող ցանկացած քաղաքական և պետական գործիչ, իսկ Լ. Տեր-Պետրոսյանն աչքի է ընկել իր պետականամետ կեցվածքով, եթե իր տեսակետները հանրային ընկալում չեն ունենում, չի պահանջում դուրս գալ փողոց և աղաղակել «այո» կամ «ոչ», այլ հեռանում է՝ հնարավորություն տալով այլ գործիչների, որոնք կարող են փոխել իրավիճակը: Տեր-Պետրոսյանից հետո ոչ ոք իշխանությունից հեռանալ չցանկացավ: Ռ. Քոչարյանը իր բոլոր հաջողված գործերը չեղարկեց Մարտի 1-ով… Այնուհետև Ս. Սարգսյանը հայտարարեց, որ սահմանադրական փոփոխություններից հետո չի առաջադրվելու, բայց հետո փոխեց մտադրությունը: Կարծում եմ՝ մեր այսօրվա բոլոր անհաջողությունները գալիս են իշխանությունը չհանձնելու զարմանալի մոլուցքից, չգիտեմ դա մոլագարություն անվանել, թե իշխանագարություն»:
«Անտարես» հրատարակչության տնօերն Արմեն Մարտիրոսյանի դիտարկմամբ՝ 1998-ին տեղի ունեցածը հեղաշրջում էր. «Ուղղակի Տեր-Պետրոսյանը խուսափելով քաղաքացիական խժդժություններից, Հայաստանում հնարավոր բախումներից, գնաց հրաժարականի քայլին՝ հանուն Հայաստանի: Քաղաքական գործիչը ավելի շատ պետք է մտածի պետության համար, քան թե սեփական իշխանության»:
Գերագույն խորհրդի նախկին պատգամավոր Ազատ Արշակյանի դիտարկմամբ՝ Տեր-Պետրոսյանը հենց այնպես հանձնվող չէր, նա կամային, կարծր քաղաքական գործիչ է. «Մենք հիշենք, թե քանի ճակատամարտ է տվել Լ. Տեր-Պետրոսյանը. անկախության հռչակում, հանրաքվե: Ռուսաստանը Լ. Տեր-Պետրոսյանի անունը տալիս հասկանում է անկախություն, սեպառատիզմ, և դրա համար նրան ճանապարհ չեն տալիս»:
Նարինե Դիլբարյանն ընդգծեց, որ պատմությունը կրկնվում է ողբերգական գրոտեսկի տեսքով:
Արմեն Մարտիրոսյանը, անդրադառնալով Ս. Սարգսյանի, Ռ. Քոչարյանի, Վ. Մանուկյանի և մի քանի այլ գործիչների նախօրեին կայացած հանդիպմանը, նշեց. «Խորհրդակցելու կարիք ունեին: Նրանք երկրորդ անգամ ուզում էին հեղաշրջում իրականացնել հետպատերազմյան Հայաստանում, 17-ի ֆորմատով հեղաշրջումը չստացվեց, հիմա պետք է փորձեն այլ ճանապարհներ ընտրել, ակնհայտ է դա»:
Ազատ Արշակյանը հավելեց, որ նրանց հանդիպումն ու ծրագիրը ժամանակավրեպ է, նրանց ելույթները ճիշտ չեն. «Եթե գաղտնի խոսակցություն են վարել, ուրեմն վատ բան են մտածել, ուրեմն դավադրություն է, որը թաքցնում են»:
Մանրամասն՝ տեսանյութում:
