Նոյեմբերի 9-ին կազմված փաստաթղթում կան որոշակի մի քանի կետեր, մնացածը անորոշ են և թողնվել են հետագա բանակցությունների ընթացքին: Այս մասին «Առաջին լրատվական»-ի հետ զրույցում ասաց «Քաղաքացու որոշում» կուսակցության գործադիր մարմնի անդամ Հայկ Սահակյանը և հավելեց. «Հիմնական խնդիրը, որ պետք է լուծեր համաձայնագիրը, մարտական գործողությունները դադարեցնելն էր և շրջանների հանձնումը, ինչը կարծես շատ արագ կատարվեց: Մնացած կետերը կարծես բանակցության նյութ էին, բայց դրանց շուրջ բանակցելու և Հայաստանի շահերին ծառայեցնելու համար պետք է գործող պետական ապարատ: Իսկ մենք տեսնում ենք, որ մեր պետական ապարատը ամբողջությամբ կոլապսի մեջ է»:
Նրա խոսքով՝ համաձայնագրում կան Հայաստանի հետագա տնտեսական զարգացման լայն հնարավորություններ, բայց նվազագույնը, որ պետք է անել, այդ խնդիրները ձևակերպելն է, ինչը չի արվում. «Սրա շուրջ հիմա պետք է մտածենք, որովհետև սա ոչ թե 40-45 օրվա պարտություն էր, այլ մեր 30-ամյա պետության և այդպես էլ պետություն չդառնալու հետևանք էր»:
Մեր զրուցակիցը չի բացառում նաև, որ կա գաղտնի ստորագրված թուղթ, որի մասին մենք չգիտենք. «Մենք շատ քիչ բան գիտենք, իրական ինֆորմացիային ըստ էության մենք չենք տիրապետում, որպեսզի կարողանանք նորմալ գնահատել, թե ինչ եղավ. վարչապետը մի բան է ասում, մնացած կուսակցություններն ուրիշ բան են ասում, գեներալները՝ այլ բան, հանրությունը մեկ այլ բան է ասում»:
Խոսելով պաշտոնական լրատվության նկատմամբ հանրության վստահության կորստի մասին՝ Հայկ Սահակյանը նաև նկատեց. «Մի քանի հազար մարդ է մահացել, դրա համար որևէ մեկը պետք է պատասխան տա՞, թե՞ ոչ: Բոլորը, սկսած վարչապետից, մեղքն իրենց վրայից բարդում են մեկ ուրիշի վրա: Այս պատերազմի մասին հասարակությունը պետք է իմանա ամբողջ ճշմարտությունը»:
Առավել մանրամասն՝ տեսանյութում:
