Կիպրոսի Հանրապետության Ներկայացուցիչների պալատի նախագահ Դիմիտրիս Սիլուրիսը հասարակության ճնշման ներքո հինգշաբթի պաշտոնապես հայտարարել է իր հրաժարականի և խորհրդարանը լքելու մասին՝ ներդրումների դիմաց քաղաքացիություն տրամադրելու ծրագրի իրականացման ընթացքում խախտումների շուրջ սկանդալի ֆոնին: Սիլուրիսը, որն ավելի վաղ խոստացել էր դադարեցնել իր պարտականությունների կատարումը գալիք երկուշաբթի օրվանից մինչև հետաքննության ավարտը, իր որոշման մասին հայտարարել է հատուկ տարածված հայտարարությամբ:
«Հաշվի առնելով իմ պաշտոնավարման հետ կապված սխալ մեկնաբանությունը և իրենց քաղաքական նպատակների և ծրագրերի համար այս ամբողջ իրավիճակից օգտվելու ոմանց ակնհայտ ցանկությունը, ինչպես նաև իշխանության օրենսդիր մարմնի գործունեությունը խափանելու պատրվակները, ես որոշում կայացրի հրաժարական տալ ինչպես խորհրդարանի խոսնակի, այնպես էլ խորհրդարանականի պաշտոնից»,- ասել է քաղաքական գործիչը: Սիլուրիսը նաև հավելել է, որ համոզված է այն բանում, որ չի խախտել երկրի օրենքները:
Այս հայտարարության պատճառը Al Jazeera-ի պնդումն էր, որ Սիլուրիսը, Կիպրոսի Աշխատավոր ժողովրդի առաջադիմական կուսակցությունից խորհրդարանական Քրիստակիս Յովանիսի հետ, իբր պատրաստակամություն է հայտնել օգնել փողերի լվացման համար յոթ տարվա ազատազրկման դատապարտված ոմն չինացի գործարարի՝ Կիպրոսի քաղաքացիություն ստանալու հարցում: Al Jazeera-ի լրագրողը ֆիքսել է այս պահը՝ քաղաքական գործիչներին ներկայանալով որպես գործարարի վստահված անձ:
