Համալսարանների վարկանիշների համաշխարհային կենտրոնը (CWUR) հրապարակել է աշխարհի լավագույն բուհերի ցանկը, որտեղ ընդգրկված են աշխարհի տարբեր երկրներից 2 հազար բարձրագույն ուսումնական հաստատություններ։ Ցանկում ընդգրկվել է նաև Երևանի ֆիզիկայի ինստիտուտը՝ զբաղեցնելով 774-րդ հորիզոնականը:
CWUR-ի վարկածով աշխարհի 2 հազար լավագույն համալսարանների դասակարգումը համալսարանների միակ վարկանիշն է, որը գնահատում է կրթության որակը, աշխատաշուկայում շրջանավարտների պահանջարկը, ինչպես նաև գիտական գործունեությունը՝ առանց համալսարանների կողմից առաջարկվող հարցումների և տեղեկատվության օգտագործման:
Համաշխարհային վարկանիշի առաջատարը, իններորդ տարին անընդմեջ, Հարվարդի համալսարանն է, որը յոթ ցուցանիշներից վեցով աշխարհում առաջին տեղում է, իսկ կրթության որակով՝ երրորդ: Վարկանիշային աղյուսակի երկրորդ և երրորդ տեղերում նույնպես ԱՄՆ-ի համալսարաններն են՝ Մասաչուսեթսի տեխնոլոգիական ինստիտուտը և Ստենֆորդը:
Չորրորդ և հինգերորդ հորիզոնականներում, համապատասխանաբար, բրիտանական Քեմբրիջ և Օքսֆորդ համալսարաններն են: Ընդ որում, Քեմբրիջն աշխարհում առաջին տեղում է կրթության որակով:
