Ֆուտբոլի Ադրբեջանի ազգային հավաքականի դարպասապահ Էմիլ Բալաևը խզել է պայմանագիրը ղազախական «Տոբոլի» հետ, որը գլխավորում է հայազգի մասնագետ Գրիգորի Բաբայանը։ «Տոբոլում» է հանդես գալիս նաև Հայաստանի ազգային հավաքականի կիսապաշտպան Պետրոս Ավետիսյանը։ Փաստորեն, ադրբեջանական մարազմը շատ ավելի ուժեղ գտնվեց բանականությունից և մարզական համերաշխությունից։ Բալաևը հանդիսանում էր «Տոբոլի» հիմնական դարպասապահը, ում հետ թե ակումբում, և թե Ադրբեջանի ազգային թիմում մեծ հույսեր էին կապում։ 2019 թվականի դեկտեմբերին «Տոբոլի» գլխավոր մարզիչ էր նշանակվել Ղազախստանում ճանաչված մասնագետ Գրիգորի Բալայանը, ինչը վայնասունի ալիք բարձրացրեց Ադրբեջանում։ Մասնավորապես հարևան երկրի ԶԼՄ-ներն ինչպես նաև սպորտում ճանաչված մարդիկ անթույլատրելի համարելով Բալաևի հայ մարզչի գլխավորությամբ խաղալը՝ նրա վրա ճնշում գործադրելով պահանջում էին հեռանալ «Տոբոլից»։
Վերջինս հունվարի 7-ին ուսումնամարզական հավաքի էր մեկնել Դուբայ։ Ըստ ղազախական լրատվամիջոցների Էմիլ Բալաևը նույնպես մեկնել էր Դուբայ, սակայն չէր մասնակցել մարզումներին և ժամանել էր Թուրքիա՝ վերականգնողական փուլ անցնելու։ «Տոբոլը» նախ հայտարարել էր, որ Բալաևը վնասվածք ունի, սակայն ինքը ֆուտբոլիստը հերքել էր այս տեղեկությունը նշելով, որ միանգամայն առողջ է և ռեաբիլիտացիոն փուլ անցնելուց զատ նաև մարզվում է անհատական ծրագրով։ Այնուհետև «Տոբոլը» հայտնել էր ռեաբիլիտացիոն փուլի երկարաձգման մասին։ Բալաևի ծառայությունով հետաքրքրված էին բավական ուժեղ թիմեր՝ Գրոզնիի «Ախմատը» բելգիական «Գենտը», բայց․․․։ ««Տոբոլը» Ադրբեջանի հավաքականի դարպասապահի տրանսֆերի համար պահանջում է կես միլիոն եվրո, որը փոքր գումար չէ։ Մեր դարպասապահը երկտասարդ է և նրա որակները դեռևս հեռու են եվրոպական չափանիշներից։ Բնական է, որ նման գումար դժվար թե որևէ ակումբ վճարի երիտասարդ դարպասապահի համար։ Մեզ մնում է հուսալ, որ Բալաևը այլ ակումբ կտեղափոխվի գոնե վարձականության հիմունքներով։
Այս տարբերակը կարծում եմ ձեռնտու կլինի բոլորին։ Փաստն այն է, որ հայերի պատճառով Ադրբեջանի հավաքականի դարպասապահի ճակատագիրը վտանգված է»,- օրեր առաջ ասել էր ադրբեջանցի լրագրող Ռուսլան Միքայիլին։ Ստացվում է, որ ղազախական ակումբը չգնալով նույնիսկ Բալաևին վարձավճարով այլ թիմին տրամադրելու տարբերակին ուղղակի խզել է պայմանագիրը նրա հետ ըստ էության կորցնելով արժեքավոր ֆուտբոլիստի։ Բալաևի՝ «Տոբոլից» հեռանալը միանգամայն անընդունելի էր նրա գործակալ Ստանիսլավ Ստանիսլավսկիի համար։ Մասնավորապես, ըստ նրա Բալաևի խաղով հետաքրքրված են բազմաթիվ բարձրակարգ թիմեր, և չի բացառվում, որ մոտ ապագայում այս ֆուտբոլիստը հայտնվի ավելի ուժեղ թիմում։ Ուստի «Տոբոլում» փորձ ձեռք բերելն ու աճելը պետք է Բալաևի համար լինի առաջնային։ «Քաղաքական դրդապատճառներով «Տոբոլից» հեռանալը կարող է լուրջ հետևանք թողնել ֆուտբոլիստի կարիերայում։ Ոմանք փորձում են արհեստական եղանակներով սրել իրավիճակը և կոնֆլիկտներ առաջացնել։ Ֆուտբոլն ու քաղաքականությունը չպետք է բախվեն։
Այո, հասկանում եմ, որ երբեմն դա հնարավոր չի լինում, բայց… Հավանաբար շատերն են տեղյակ, որ Բաբայանը ծնվել և ապրել է Ալմաթիում: Ես արդեն խոսել եմ ակումբի նախագահ Նիկոլայ Պանինի հետ, որն ինձ հավաստիացրել է՝ Էմիլին ոչ ոքի չի նեղացնի: Պետք է նշեմ նաև, որ հարցի ոչ մարզական կողմը խոչընդոտ չի հանդիսանա, և առաջին պլան կմղվի պրոֆեսիոնալ վերաբերմունքը»,- նշել էր Ստանիսլավսկին: Հիմա արդեն վստահաբար կարող ենք ասել, որ Բալաևը «Տոբոլից» հեռացավ քաղաքական դրդապատճառով, որը ոչ այլ ինչ էր, քան փախուստ։
Բալաևն այս պահին չունի թիմ և նրա ճակատագիրն անորոշ է։