Պետդումայի տարբեր խմբակցությունների մի խումբ պատգամավորներ հայց են պատրաստել Ռուսաստանի գլխավոր դատախազ Յուրի Չայկայի անունով՝ պահանջելով, որ դատախազությունը ստուգում անցկացնի ԽՍՀՄ-ի փլուզման շրջանում տեղի ունեցած իրադարձությունների վերաբերյալ:
Խորհրդարանականները կարծում են, որ հարցման և հաջորդող ստուգման հիման վրա կարող են քրեական գործեր հարուցվել, այդ թվում և Միխայիլ Գորբաչովի դեմ: Այս մասին գրում է «Իզվեստիա»-ն:
Պատգամավորներն իրենց ուղերձում նշում են, որ ԽՍՀՄ քաղաքացիները հանրաքվեի ժամանակ կողմ էին արտահայտվել պետության միասնության պահպանմանը, իսկ խորհրդային բարձրաստիճան ղեկավարներն անօրինական գործողություններ են կատարել, որոնք հանգեցրել են երկրի փլուզման:
Գորբաչովին մեղադրում են նրանում, որ նա ստեղծել է ԽՍՀՄ Պետխորհուրդը, որը ԽՍՀՄ Սահմանադրությամբ նախատեսված չի եղել որպես պետական իշխանության մարմին: Հենց Պետխորհուրդն է ընդունել որոշումներ Մերձբալթյան խորհրդային հանրապետությունների անկախության ճանաչման մասին:
Նրանց խոսքով՝ ստուգումը շատ կարևոր է, քանի որ մինչ օրս չի եղել որևէ իրավական գնահատական պետության մասնատման փաստով:
Պատգամավորները նշել են, որ նման հանցագործությունները վաղեմության ժամկետ չունեն, իսկ Գորբաչովը հիմա քրեական հետապնդման որևէ անձեռնմխելիություն չունի:
