Լոնդոնի «Արսենալի» Եվրոպա լիգայի խաղարկության եզրափակիչ դուս գալուն պես ուշադրության կենտրոնում հայտնվեց անգլիական հայ կիսապաշտպան Հենրիխ Մխիթարյանը: Մասնավորապես, շարունակ խոսվում է Մխիթարյանի Բաքու մեկնել չմեկնելու, ինչպես նաև Ադրբեջանական կողմի անվտանգության երեշխիքների մասին: Երեկ առավոտյան բրիտանական ԶԼՄ-ները տեղեկություն էին տարածել, ըստ որի«Արսենալի» ղեկավարները կարծում են, որ Մխիթարյանն անվտանգության հետ կապված լուրջ խնդիրների կարող է հանդիպել Բաքվում: Daily Mail-ը նույնիսկ գրել էր, քաղաքական պատճառներով Մխիթարյանը կարող է չմեկնել Բաքու:
Նշվում էր, որ «Արսենալում» կասկածներ ունեն, որ ադրբեջանցիները հնարավոր է արհեստական խնդիրներ ստեղծեն հայ ֆուտբոլիստի համար, որը բացասական կանդրադառնա նաև թիմի համար: «Արսենալի» երկրպագուները իրենց զայրույթն են արտահայտել ծագած խնդրի վերաբերյալ և սոցիալական կայքերում գրոհ սկսել ընդդեմ Ադրբեջանի: «Այն, որ Մխիթարյանը կարող է վիզա ստանալ, սակայն Ադրբեջանի կառավարությունը չի ապահովի նրա անվտանգությունը, Մխիթարյանի համար դա մահ կարող է լինել»,- գրել է երկրպագուներից Olivia Landry-ն: Մեկ այլ երկրպագու էլ գրել է, որ խեղկատակություն է Եվրոպայի լիգայի եզրափակիչը Բաքվում անցկացնելն այն դեպքում, եթե նրանք Մխիթարյանին չեն թողնելու այդ երկիր մտնել:
«Եթե Ադրբեջանը սկսի «խաղեր խաղալ», ապա եզրափակիչը պետք է անցկացնել «Ուեմբլի» մարզադաշտում»,- նշել է զայրացած երկրպագուն: Ինչևէ, Ադրբեջանի ֆուտբոլի ֆեդերացիաների ասոցիացիան ՈՒԵՖԱ-ին հավաստիացրել է, որ Հենրիխ Մխիթարյանը Բաքու այցելելու խնդիր չի ունենա: Այս մասին հայտնում է ռուսական ՏԱՍՍ գործակալությունը, որը հրապարակել է ՈՒԵՖԱ-ին ուղարկված հարցման պատասխանը:«ՈՒԵՖԱ-ի հովանու ներքո անցկացվող հանդիպումներին մասնակցելու համար ֆուտբոլիստների համար այլ երկրների վիզա ստանալու նպատակով ֆուտբոլային ասոցիացիաների, ակումբների և դեսպանատների հետ նամակագրությունը կազմակերպության համար ստանդարտ գործընթաց է:
Այս հարցով ՈՒԵՖԱ-ն և «Արսենալը» հաստատում են խնդրել, իսկ Ադրբեջանի ֆուտբոլի ֆեդերացիաների ասոցիացիան հաստատել է, որ այդ ֆուտբոլիստը երկիր այցելելու խնդիր չի ունենա, ինչպես նաև կձեռնարկվեն անվտանգության համար անհրաժեշտ բոլոր միջոցառումները»,- ասված է ՈՒԵՖԱ-ի պատասխանի մեջ: Այդուհանդերձ, երեկ երեկոյան News.sky.com պարբերականը գրեց, որ «Արսենալ» ֆուտբոլային ակումբի ղեկավարությունը Մխիթարյանի անվտանգության համար երաշխիքներ է պահանջում ՈՒԵՖԱ-ից: «Մեր ֆուտբոլիստների անվտանգությունը առաջնահերթ նշանակություն ունի: Մենք ՈՒԵՖԱ-ից երաշխիքներ ենք պահանջում, որ Հենրիխ Մխիթարյանի անվտանգությունը կապահովվի, եթե նա Եվրոպայի լիգային մասնակցելու նպատակով մեկնի Բաքու»,- ասված է ակումբի տարածած հայտարարությունում: Սրանից կարելի է եզրակացնել, որ թեև ՈւԵՖԱ-ն «Արսենալին» կարող է աջակցել հայ ֆուտբոլիստի վիզա ստանալու հարցում, բայց այնուամենայնիվ անվտանգության ապահովման հետ կապված խնդիրներ կան: Որոշ լրատվամիջոցների համաձայն «Արսենալի» ղեկավարությունը սպասում է, որ Մխիթարյանի անվտանգության երաշխիքներ պաշտոնապես ներկայացվի Ադրբեջանի կառավարության կողմից: Միայն դրանից հետո լոնդոնյան ակումբի ղեկավարությունը որոշում կկայացնի Մխիթարյանի Բաքու մեկնելու վերաբերյալ: Հարևան երկրի կառավարությունը այս առթիվ դեռևս հայտարարություն չի տարածել, ինչի հետևանքով էլ հատկապես անգլիացի երկրպագուների շարքում կրքերը բորբոքվում են:
Ադրբեջանում առաջին անգամ տեղի է ունենալու նման մակարդակի հանդիպում և կարծում ենք ժամանակն է, որ մեր հարևանները պատշաճ գիտակցություն ցուցաբերեն և ավելորդ լարվածություն չստեղծեն: Կասկածից վեր է, որ եթե Մխիթարյանը արհեստական պատճառով բաց թողնի Եվրոպա լիգայի եզրափակիչը դա լուրջ հարված կլինի Ադրբեջանի հեղինակությանը: Վստահ ենք, որ անհրաժեշտ բոլոր երեշխիքների ապահովման դեպքում Մխիթարյանը կմեկնի Բաքում և կմասնակցի կարևորագույն հանդիպմանը:
Հիշեցնենք, որ «Չելսի»-ՙ«Արսենալ» հանդիպումը կայանալու է մայիսի 29-ին Բաքվի Օլիմպիական մարզադաշտում: