Չեմպիոնների լիգայի խաղարկության կիսաեզրափակչի առաջին խաղում «Բարսելոնան» սեփական հարկի տակ 3:0 հաշվով առավելության հասավ «Լիվերպուլի» նկատմամբ՝ հաստատուն քայլ կատարելով դեպի եզրափակիչ: Հանդիպումն ընթացավ լարված և դիտարժան պայքարում: Առաջին խաղակեսում և հատկապես երկրորդ կեսի սկզբնամասում անգլիական թիմը առավելություն ուներ, և թվում էր, թե գերմանացի մասնագետ Յուրգեն Կլոպի ֆուտբոլիստները գոնե մեկ գնդակ կխփեն, բայց…
Ընդունենք, որ «Լիվերպուլը», համենայնդեպս, «Բարսելոնայից» վատ չէր խաղում: Ըստ վիճակագրական տվյալների՝ հանդիպման ընթացքում «Լիվերպուլն» ավելի շատ է տիրել գնդակին՝ ունենալով տարածքային առավելություն: «Լիվերպուլի» ֆուտբոլիստները ավելի շատ գոլային պահեր ստեղծեցին և ավելի շատ հարված կատարեցին դեպի դարպասը: Այստեղ հարց է ծագում՝ երեկ ո՞վ ավելի լավ խաղաց, և արժանի՞ էր արդյոք «Լիվերպուլը» պարտության:
Մեր երկրում, հատկապես ազգային հավաքականների ելույթներից հետո, շատ են եղել դեպքեր, երբ մարզիչները հայտարարել են, որ լավ խաղացինք, բայց պարտվեցինք: Նույնիսկ Ազգերի լիգայի խաղարկությունից հետո փորձ էր արվում համոզել, որ մեր հավաքականը այնքան էլ վատ չի խաղացել՝ ի ցույց դնելով վիճակագրական տվյալներ: Տարիներ շարունակ մենք մեզ համոզել ենք, որ կարելի է լավ ֆուտբոլ ցուցադրել և պարտվել: Վերջերս Հայաստանի ֆուտբոլի ֆեդերացիայի նախագահ Արթուր Վանեցյանը, խոսելով ազգային հավաքականի գլխավոր մարզչի հնարավոր փոփոխության մասին, նշել էր, որ մեր ազգային թիմի խաղում դրական տեղաշարժ է նկատվում, և որ պետք է այդ խաղերը դիտել պրոֆեսիոնալի աչքով:
Հիշեցնենք, որ Հայաստանի հավաքականը Եվրոպայի առաջնության ընտրական փուլի մեկնարկային երկու հանդիպումներում նույնքան պարտություն էր կրել՝ զիջելով Բոսնիա-Հերցեգովինայի և Ֆինլանդիայի հավաքականներին: Ֆինլանդիայից Երևանում կրած պարտությունից հետո Հայաստանի հավաքականի գլխավոր մարզիչ Արմեն Գյուլբուդաղյանցն ասել էր. «Սխալ եղավ, դրա համար գոլ բաց թողեցինք: Առանց սխալների գոլեր չեն լինում: Իսկապես պարզ գոլեր եղան: Մենք էլ ունեցանք գոլային պահեր, բայց չկարողացանք օգտագործել: Կարծես մենք պետք է գոլ խփեինք, բայց արդյունքում բաց թողեցինք»:
Երեկվա պարտությունից հետո ըստ էության նմանատիպ գնահատական է հնչեցրել նաև «Լիվերպուլի» գլխավոր մարզիչ Յուրգեն Կլոպը: «Այսպիսին է ֆուտբոլը: Ամեն ինչ կախված է գոլերից: Դաշտի տերերը երեք գնդակ խփեցին, իսկ մեզ չհաջողվեց գոնե մեկ անգամ աչքի ընկնել: Մենք շատ լավ էինք խաղում, տղաները հիանալի հանդիպում անցկացրին, բայց «Բարսելոնայի» համար հերիք է ընդամենը մի քանի գոլային պահեր ունենալ: Ինձ դուր եկավ նաև խաղը, բայց ոչ արդյունքը: Մենք զիջեցինք խոշոր հաշվով, և ես ընդունում եմ գրանցված արդյունքը»,- նշել էր գերմանացի մասնագետը:
Կարծում ենք՝ մեկնաբանություններն ավելորդ են: Ցավալի պարտությունների վերաբերյալ Հայաստանի ազգային թիմի և «Լիվերպուլի» գլխավոր մարզչի կարծիքները համընկնում են: Իսկապես ցավալի է, երբ պայքարում ես, ունենում ես մի շարք գոլային պահեր, սակայն արձանագրվում է 2:0 կամ 3:0 հաշիվ՝ հօգուտ մրցակցի:
Եթե Գյուլբուդաղյանցը լավ խաղալու և պարտվելու գլխավոր պատճառ է ներկայացնում սխալները, ապա Յուրգեն Կլոպը տեղի ունեցածը մեկնաբանում է երկու բառով՝ սա է ֆուտբոլը: Կլոպի դիտարկումը, որոշակի վերապահումով, կարելի է սպառիչ համարել: Այո, սա է ֆուտբոլը, որը պետք է կարողանալ խաղալ և արդյունքի հասնել: Կարելի է ասել, որ «Բարսելոնայի» երեկվա ցուցադրած խաղը ուղերձ էր Կլոպին, Գյուլբուդաղյանցին և էլի շատ մասնագետների: Ավելի ստույգ՝ իսպանական ակումբը կրկին ցույց տվեց, որ ժամանակակից ֆուտբոլում գլխավորը ոչ թե տպավորիչ խաղն է, այլ արդյունքը: «Լիվերպուլը» շարունակ ճնշում էր, սակայն վերջին հարվածն այդպես էլ չէր ստացվում:
Ասել, որ «Լիվերպուլի» հարձակման գիծն ավելի թույլ է, քան «Բարսելոնայինը», ճիշտ չի լինի: «Լիվերպուլի» կազմում խաղում էին այնպիսի կատարողներ, ինչպիսիք են Սալահը, Մանեն, Ֆիրմինոն… Ասել, որ նշված ֆուտբոլիստների խաղը չէր ստացվում, նույնպես ճիշտ չի լինի: Հատկապես Մանեն և Սալահը մեծ ծավալի աշխատանք կատարեցին և շարունակ սրություն էին հաղորդում գրոհներին:
Եթե մեկ բառով փորձենք նկարագրել «Բարսելոնայի» խաղը, ապա պետք է նշենք, որ այն իդեալական էր: Իսպանական թիմը 100 տոկոսով արեց իր գործը, այն է՝ օգտագործեց գոլային պահերը և գնդակ բաց չթողեց: Իսկ թե ինչպիսի խաղով դա արեց Էռնեստո Վալվերդեի թիմը, կարծում ենք՝ երկրորդական է:
Կարծում ենք՝ նաև շատերը համաձայն կլինեին, որ Հայաստանի ազգային հավաքականը ցույց չտար տպավորիչ խաղ, բայց շարունակ հաղթեր: «Բարսելոնան» այսօր խաղում է ժամանակակից ֆուտբոլ, որին հասնելու համար լուրջ աշխատանքներ պետք է տարվեն: «Լիվերպուլը» Եվրոպայի ուժեղագույն ակումբներից է, սակայն երեկվա հանդիպումը ցույց տվեց, որ ամենևին էլ իդեալական չէ: