Աիդա Դավթյանի նախագահությամբ, տեղի ունեցավ ՀՀ երկրորդ նախագահ Ռոբերտ Քոչարյանի որդու՝ Սեդրակ Քոչարյանի ընդդեմ ԱԱԾ տնօրեն Արթուր Վանեցյանի գործով դատական նիստը: Նիստն եղել է Երևանի ընդհանուր իրավասության դատարանի Աջափնյակ նստավայրում։
Նախորդ դատական նիստում Արթուր Վանեցյանի ներկայացուցիչ Վահագն Գրիգորյանի ներկայացրած ապացույցների վերաբերյալ Սեդրակ Քոչարյանի ներկայացուցիչ Անի Ալավերդյանը գրավոր դիրքորոշում ներկայացրեց այս դատական նիստին:
Վանեցյանի ներկայացուցիչ Վահագն Գրիգորյանը նշեց, որ Սեդրակ Քոչարյանի ներկայացուցիչ Անի Ալավերդյանի ներկայացրած գրավոր դիրքորոշումը բաղկացած է երկու մասից: Առաջին մասում խոսվում է այն մասին, թե ապացույցներն անթույլատրելի են, քանի որ չի բացահայտվել, թե ինչ նպատակով են դրանք ներկայացվել, ինչ փաստի հաստատման նպատակով: «Վկայակոչված է քաղդատավարության օրենսգրքի վերաբերելիության հոդվածը, և նշված է, որ սույն իրավիճակում կողմը տրամադրելով ապացույցները չի հայտնել, թե դրանք որ փաստական հանգամանքների հաստատմանն են ուղղված»,- ասաց նա:
Ըստ փաստաբանի՝ երկրորդ մասը վերաբերում էր կոնկրետ իրենց կողմից ներկայացված ապացույցներից մեկին՝ ԱԱԾ-ի հաղորդագրությանը: «Մեր կողմից ներկայացվել են թվով ինը լրատվամիջոցում լույս տեսած հոդվածներ, որոնք հիմնավորում են, որ արտահայտություններն ուղղված չեն հայցվորին՝ Սեդրակ Քոչարյանին: Թե ինչպես են հիմնավորվում կամ չեն հիմնավորվում, դա արդեն դատաքննությունը կպարզի: Ամեն դեպքում մենք այս պահի դրությամբ նշում ենք, որ մամուլում լույս տեսած հոդվածները ներկայացվել են այդ փաստը ապացուցելու նպատակով»,- ասաց նա: