ԵՄ-Ադրբեջան համաձայնագիրը մեզ չի առնչվում, այն ԵՄ-ի և Ադրբեջանի հարաբերությունների խնդիր է, բայց իհարկե, մենք պետք է հետևենք և պետք է մեր եվրոպացի գործընկերների հետ շփումներում այդ հարցը մեր ուշադրությունից չպետք է վրիպի: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Միքայել Զոլյանը՝ անդրադառնալով հարցին, թե արդյոք ՀՀ իշխանությունները հետևում են ԵՄ-Ադրբեջան համաձայնագրի նախապատրաստման աշխատանքներին:
«Դա պետք է շատ նուրբ արվի, որպեսզի չստացվի, որ միջամտում ենք երրորդ երկրի հետ ԵՄ-ի կապերին: Այստեղ թե մեր պրոֆեսիոնալ դիվանագետները գործ ունեն անելու, թե խորհրդարանական դիվանագիտությունը: Իհարկե, մեր հնարավորություններն այստեղ սահմանափակ են»,-ասաց Զոլյանը:
Նա հույս հայտնեց, որ ԵՄ համապատասխան պաշտոնյաները լավ տեղյակ են հարցին. «Համենայնդեպս, ես ինքս, երբ շփվել եմ ԵՄ արտաքին քաղաքականության համար պատասխանատու պաշտոնյաների հետմ, որոնք աշխատում են Հարավային Կովկասի հետ, նրանք կարծես թե տեղյակ են, թե ինչ իրավիճակ է և պետք է զգույշ լինեն»: