Մարտի 23-ին, ժամը 23:45-ին, Սարաևոյի «Գրբավիցա» մարզադաշտում տեղի կունենա 2020 թվականի Եվրոպայի առաջնության ընտրական փուլի առաջին տուրի Բոսնիա և Հերցեգովինա-Հայաստան հանդիպումը: Բնական է, որ այս մրցավեճում բացահայտ ֆավորիտը դաշտի տերերն են, որոնք լուրջ հավակնություններ ունեն Եվրոպայի առաջնության եզրափակիչ փուլում հայտնվելու: Բուքմեյքերները բոսնիացիների հաղթանակի համար սահմանել են 1.35 գործակից, մինչդեռ ոչ-ոքին գնահատված է 5.2, իսկ Հայաստանի հավաքականի հաղթանակը՝ մոտ 9 գործակից:
Բնական է, բալկանյան հավաքականը կարգով գերազանցում է Հայաստանի հավաքականին և վերջին շրջանում աչքի է ընկել արդյունավետ մրցելույթներով: Ազգերի լիգայի խաղարկությունում Բոսնիան ընդգրկված էր B դիվիզիոնի 3-րդ ենթախմբում: Բոսնիացիների մրցակիցներն էին Ավստրիայի և Հյուսիսային Իռլանդիայի հավաքականները: Ենթախմբային 4 հանդիպումներում տանելով 3 հաղթանակ և մեկ խաղ ավարտելով ոչ-ոքի՝ մեր առաջիկա մրցակիցը խմբում գրավել էր առաջին հորիզոնականը և դուրս եկել փլեյ-օֆ: Ի դեպ, այդ չորս հանդիպումներում Բոսնիան բաց էր թողել ընդամենը մեկ գնդակ Հյուսիսային Իռլանդիայի հետ արտագնա մրցավեճում: Կարծում ենք՝ գրանցված արդյունքը ավելի քան տպավորիչ է:
2018 թվականի հունվարից Բոսնիա-Հերցեգովինայի հավաքականը գլխավորում է խորվաթ մասնագետ Ռոբերտ Պրոսինեչկին, որը մինչ այդ Ադրբեջանի ազգային թիմի ղեկին էր: Պրոսինեչկիի գլխավորությամբ բոսնիացիներն անցկացրել են 12 հանդիպում և կրել ընդամենը երկու պարտություն: Առաջին դեպքում Բոսնիան անցյալ տարվա փետրվարին Մեքսիկայի հետ ընկերական մրցավեճում պարտվել է 1:0 հաշվով: Նույն հաշվով էլ Պրոսինեչկիի թիմը անցյալ տարվա նոյեմբերին ընկերական խաղում զիջել է Իսպանիային: Պաշտոնական հանդիպումներում Բոսնիայի հավաքականը պարտություն չի կրել: Պրոսինեչկիին բնորոշ է հարձակողական մարտավարությունը: 12 հանդիպումներից 8-ում բոսնիացիները պայքարել են ընդգծված հարձակողական 4-3-3 դասավորությամբ: Ընկերական հանդիպումների ժամանակ Պրոսինեչկին 3 անգամ փորձարկել է 4-2-3-1 և մեկ անգամ՝ 4-1-4-1 դասավորությունը: Պաշտոնական բոլոր չորս հանդիպումներում Բոսնիան խաղացել է բացառապես 4-3-3 սխեմայով:
Մեծ է հավանականությունը որ Հայաստանի հավաքականի դեմ էլ Բոսնիան կխաղա 4-3-3 դասավորությամբ: Հարձակման կենտրոնում տարիներ շարունակ խաղում է բոսնիական ֆուտբոլի կենդանի լեգենդ՝ «Ռոմայի» ներկայացուցիչ Էդին Ջեկոն: Վերջինս ազգային հավաքականում անցկացրել է 99 հանդիպում և դարձել 55 գոլի հեղինակ: Հայաստանի հավաքականի հետ հանդիպումը նրա համար կլինի 100-րդ հոբելյանականը: Հարձակման աջ եզրում Պրոսինեչկին սովորաբար օգտագործում է թուրքական «Իստանբուլի» ներկայացուցիչ Էդին Վիսչային: Ձախ եզրում էլ սովորաբար գործում է Դրեզդենի «Դինամոյի» հարձակվող Հարիս Դուլյևիչը: Բոսնիական ֆուտբոլի մեկ այլ աստղ՝ «Յուվենտուսի» ներկայացուցիչ Միրալեմ Պյանիչը խաղում է կիսապաշտպանության կենտրոնում: Բոսնիացիների երրորդ առաջատարը՝ «Արսենալի» ձախ պաշտպան Սեադ Կոլաշինացը, իր ազգային թիմում ևս խաղում է ձախ գոտում: Նշենք, սակայն, որ այս ֆուտբոլիստի մասնակցությունն առաջիկա հանդիպմանը հարցականի տակ է: Կոլաշինացը վնասվածք ունի, և հնարավոր է Պրոսինեչկին նրան խնայի մարտի 26-ին կայանալիք Հունաստանի հավաքականի դեմ խաղի համար:
Որպեսզի Բոսնիայի հավաքականի ներուժն ավելի պատկերավոր լինի, նշենք, որ մեր մրցակցի ֆուտբոլիստների տրանսֆերային ընդհանուր արժեքը կազմում է 165 միլիոն եվրո: Հավաքականի 23 ֆուտբոլստներից 17-ի տրանսֆերային արժեքը գերազանցում է մեկ միլիոն եվրոն: Հայաստանի հավաքականի ֆուտբոլիստների ընդհանուր տրանսֆերային արժեքը կազմում է 40 միլիոն եվրո, որից 30 միլիոնը՝ Հենրիխ Մխիթարյանի տրանսֆերային արժեքի հաշվին: Բացի Մխիթարյանից՝ մեր հավաքականում միայն Սարգիս Ադամյանն է, որի տրանսֆերային արժեքը գերազանցում է մեկ միլիոն եվրոն: Ինչևէ, ՖԻՖԱ-ի դասակարգման աղյուսակում բոսնիացիներն այս պահին 35-րդն են:
Հիշեցնենք, որ 2014 թվականին Բոսնիայի հավաքականը պատմական հաջողության էր հասել՝ ելույթ ունենալով աշխարհի առաջնության ընտրական փուլում: Դրանից հետո Բոսնիայի ազգային թիմում որոշակի անկում է տեղի ունեցել՝ կապված սերնդափոխության հետ: Ներկայում, սակայն, բալկանյան հավաքականը վերելքի փուլում է: Պրոսինեչկիի հավաքականը ցուցադրում է արագ և ինչ-որ տեղ ագրեսիվ ֆուտբոլ: Վերլուծելով ազգերի լիգայում բոսնիացիների անցկացրած հանդիպումները՝ դժվար է խոսել թույլ կողմերի մասին: Պրոսինեչկիին կարծես հաջողվել է բալանսավորել խաղային բոլոր օղակները:
Ինչպե՞ս կոտրել միլիոնանոց տղերքի դիմադրությունը: Այս հարցի պատասխանը կարող է տալ թերևս մեր հավաքականի գլխավոր մարզիչ Արմեն Գյուլբուդաղյանցը: Այո, նման հավաքականի հետ դրսում դրական արդյունքի հասնել իսկապես բարդ է, բայց, ինչպես ընդունված է ասել, ֆուտբոլում անհնարին ոչինչ չկա:
