Դաշնակցություն կուսակցության ներսում բավականին անհանգիստ են ներքաղաքական զարգացումների և հատկապես այդ զարգացումներին իրենց մասնակցության խնդիրների առումով: ՀՅԴ-ն վերջին ամիսներին «Բարգավաճ Հայաստան» կուսակցության հետ միասին ակտիվ քննադատության է ենթարկում իշխանություններին ու հատկապես կառավարությանը: Կուսակցությունն այդ գործընթացում կարծես ոչ թե անկախ է, այլ սպասարկում է ԲՀԿ-ի ծրագրերն ու շահերը: Խնդիրն այն է, որ մեծ գործընթացների համար մարդկային և ֆինանսական ռեսուրսներ են անհրաժեշտ, ինչը, հասկանալի է, ՀՅԴ-ն չունի այնչափ, որքան ունի և օգտագործում է իրեն ընդդիմությունից ետ պահող և այլընտրանք համարող ԲՀԿ-ն: Իհարկե, այդ շահերը երբեմն համընկնում են:
«Առաջին լրատվական»-ի տեղեկություններով՝ այդ կուսակցությունում մտահոգություն կա, որ քաղաքական զարգացումների շրջանակում իրենք շարունակելու են մնալ ԲՀԿ-ի ստվերում: Այդ մտահոգությունը հատկապես սրվել էր մոտ մեկ ամիս առաջ՝ վարչապետ Տիգրան Սարգսյանի և նախկին նախագահ Ռոբերտ Քոչարյանի հեռակա բանավեճի ժամանակ: ԲՀԿ-ն լինելով Ռ. Քոչարյանի հենարանը՝ ակնհայտորեն պաշտպանում էր երկրորդ նախագահին, և այդ կուսակցությունն այդ օրերին ավելի սրեց վարչապետին ուղղված քննադատությունները: ՀՅԴ-ն էլ այդ գործընթացում փորձում էր ԲՀԿ-ից ետ չմնալ՝ զուգահեռաբար մտահոգություն ունենալով, թե հաջողության հասնելու դեպքում իրենք կրկին կմնան ԲՀԿ-ի ստվերում:
Հայտնի է, որ քաղաքական դաշտում այդ երկու կուսակցությունները համարվում են Ռ. Քոչարյանին սատարող ուժեր: Եվ նկատելի է, որ երկրորդ նախագահը երբեմն փորձում է ակտիվ քաղաքական դրսևորումներ ցուցաբերել, որոնք պաշտպանվում են այս երկու կուսակցությունների կողմից: 2017-2018թթ. խորհրդարանական և նախագահական ընտրությունների ժամանակ Ռ. Քոչարյանը անձամբ կամ որևէ այլ թեկնածուի ետևից մասնակցելու է քաղաքական պայքարին՝ ունենալով այս երկու ուժերի աջակցությունը:
Այս պարագայում ՀՅԴ-ի մոտ ինչ-որ տեղ խանդի զգացողություն է առաջանում, թե նախկին նախագահի համար իրենցից որն է լինելու ֆավորիտը: Ճիշտ է, ՀՅԴ-ում կայացած ու գրագետ գործիչներն ավելի շատ են, կուսակցությունն ավելի փորձառու է, բայց տվյալ դեպքում մեծ գործոն է ԲՀԿ ղեկավար Գագիկ Ծառուկյանի ահռելի հարստությունը: ՀՅԴ-ում նույնիսկ վատ են զգում, որ իրենց 120-ամյա կայացած կուսակցական փորձով ստիպված են գնալ ԲՀԿ-ի ետևից՝ այն դեպքում, երբ այս կուսակցությունում չեն փայլում քաղաքական ունակություններով:
ՀՅԴ-ում մտահոգված են նաև, որ ինչպես Ռ. Քոչարյանի առաջին նախագահության շրջանում իրենք Հանրապետական կուսակցության ստվերում էին, այնպես էլ հետագա պայքարում կլինեն ԲՀԿ-ի ստվերում: Որոշ տեղեկությունների համաձայն՝ այս կուսակցությունում երբեմն քննարկում են, թե որն է իրենց համար ավելի ձեռնտու՝ լինել այս իշխանությունների հետ ու դառնալ ՀՀԿ-ի կցո՞րդը, թե՞ իրենց պայքարով աջակցել ԲՀԿ-ին ու լինել այդ կուսակցության կցորդը: Հենց այս պատճառով էլ այդ կուսակցության առաջնորդները երբեմն հանգրվանում են նախագահականում:
Լուսանկարը` PanARMENIAN Photo-ի
