Սերժ Սարգսյանը փետրվարի 6-9-ը կմեկնի Ռուսաստանի Դաշնություն՝ փետրվարի 7-ին ներկա լինելու Սոչիի օլիմպիադայի բացմանը: Սոչիի օլիմպիադայի բացումը բոյկոտեց արևմտյան քաղաքական հանրությունը: Զարգացած աշխարհի որևէ լիդեր այդպես էլ չհամաձայնեց մասնակցել պուտինյան օլիմպիադայի բացմանը՝ այդպիսով իր հստակ քաղաքական վերաբերմունքը ցույց տալով ՌԴ նախագահի վարած ներքին ու արտաքին քաղաքականությանը կամ հակաքաղաքականությանը, որը միտված է աշխարհում նոր բաժանարար գծերի առաջացմանը, խորհրդային կայսրության վերականգնմանը:
Այդ քաղաքականությունը հարվածի տակ դրեց նաև Հայաստանի ինքնիշխանությունը՝ ստիպելով Հայաստանի իշխանություններին հետ կանգնել եվրաինտեգրման կուրսից, Հայաստանի արտաքին քաղաքական, տնտեսական և անվտանգության խնդիրները դիվերսիֆիկացնելու կուրսից և հանձնվել Ռուսաստանին:
Այս ամենի հետևանքով Հայաստանը համաշխարհային պետությունների ընտանիքում հայտնվեց կամազուրկի դերում՝ մատնվելով գրեթե կատարյալ մոռացության և դիտարկվելով արդեն զուտ որպես տարածք, որի համար ընթանում է աշխարհաքաղաքական պայքար:
Սոչիի օլիմպիադայի բացմանը Սերժ Սարգսյանի մասնակցությունը այս գործընթացի շարունակությունն է: Պուտինի կամքի շրջանակում, Սերժ Սարգսյանը հիմա էլ նրան, այսպես ասած, ֆոն է ծառայում օլիմպիադայի բացմանը, այն երկրների առաջնորդների հետ, որոնց միջոցով ՌԴ նախագահը փորձում է ցրել միայնության ֆոնն ու ցույց տալ, որ շրջապատված է առաջին դեմքերով: Իրականում, սակայն, օլիմպիական այս բացումը, ըստ էության, էլ ավելի է ընդգծելու աշխարհից իզգոյացման փաստը և՛ Պուտինի, և՛ մնացյալ, այսպես ասած, առաջին դեմքերի համար: Եթե բանը վերաբերեր միայն առաջին դեմքերին, դա դեռ ոչինչ: Սակայն այստեղ պետությունների հարցն է, և այդ իզգոյացումը տվյալ պարագայում վերաբերելու է ոչ թե Սերժ Սարգսյանին, այլ Հայաստանին, որի նախագահի դիրքերից էլ ներկայանում է նա միջազգային ասպարեզում:
Հետաքրքիր է նաև, թե ինչ է անելու Սերժ Սարգսյանը երեք օր Սոչիում, այն դեպքում, երբ օլիմպիադայի բացումը մեկ օր է, նույնիսկ մի քանի ժամ: Համենայն դեպս, նրա որևէ այլ հանդիպման մասին որևէ տեղեկատվություն չկա: Հայաստանն էլ մարզական նշանակալից մասնակցություն չունի, որպեսզի ենթադրվի, որ Սարգսյանը հետևելու է հայաստանցի մարզիկների մասնակցությանը: Թեև չի բացառվում, որ Սոչի կատարելիք եռօրյա այցի ընթացքում փորձարկվելու է ընդամենը Կորեա կատարած առողջապահական այցի էֆեկտը: Թեև ընդհանրապես, դեռևս 2008 թվականի Պեկինի օլիմպիադայից էր պարզ, որ Սերժ Սարգսյանը թուլություն ունի նման խաղերի նկատմամբ: 2008 թվականին Հայաստանը ռուս-վրացական պատերազմի արդյունքում հայտնվել էր ծանր շրջափակման մեջ և խուճապային իրավիճակում, իսկ Սերժ Սարգսյանն ու նրա անվտանգության խորհրդի քարտուղար Արթուր Բաղդասարյանը Պեկինում անվրդով օլիմպիադա էին դիտում և մի վայրկյան անգամ չմտածեցին այցն ընդհատելու և Հայաստան վերադառնալու մասին: