Վրաստանի նախկին նախագահ Միխեիլ Սաակաշվիլիի կողմնակիցներն ու ազգայնական կուսակցությունները մեղադրել են վարչապետ Իրակլի Ղարիբաշվիլիին Մոսկվայի առջև «կապիտուլյանտության» մեջ: Նման կոշտ կշտամբանքների առիթը Վրաստանի կառավարության ղեկավարի ելույթն էր Մյունխենում անցկացված անվտանգության հարցերով համաժողովի ժամանակ: Անձամբ Ղարիբաշվիլին իր ելույթն անվանել է «Ռուսաստանի հանդեպ նոր քաղաքականություն»:
Սկզբում վարչապետին քննադատել է Վրաստանի հնագույն կուսակցություններից մեկը՝ «Իլյա Չավչավաձեի միությունը»՝ մեղադրելով Ղարիբաշվիլիին «կապիտուլյանտական» ելույթի մեջ: Այս մասին գրում է Kommersant-ը:
Այնուհետև քննադատությանը միացել են Սաակաշվիլիի «Միացյալ ազգային շարժման» առաջնորդները: Նրանք վարչապետի ելույթը Մյունխենում անվանել են ամոթալի և անսկզբունքային:
Նախկին նախագահի դաշնակիցներին դուր չի եկել հետևյալ արտահայտությունը. «Առկա են չլուծված հակամարտություններ մեր եղբայրների՝ աբխազների ու օսերի հետ»: «Դրանով իսկ Ղարիբաշվիլին անձնատուր եղավ Մոսկվային, որը փորձում է համոզել միջազգային հանրությանը, որ գլխավոր խնդիրն անձամբ Վրաստանի ներսում էթնիկ-քաղաքական հակամարտություններն են, ոչ թե ռուսական ագրեսիան»,- ասել է կուսակցության առաջնորդներից Գոկա Գաբաշվիլին:
Մյունխենում Վրաստանի վարչապետը հիշատակել է նաև «օկուպացված տարածքների» և «օկուպացիոն գծում սադրանքների» մասին: Նա մի քանի անգամ կրկնել է, որ ՆԱՏՕ-ին և ԵՄ-ին անդամակցության ձգտումը վրացի ժողովրդի պատմական ընտրությունն է, և որ Թբիլիսին ակնկալում է ստորագրել ԵՄ-ի հետ Ասոցացման համաձայնագիրն արդեն օգոստոսին: Սակայն ընդհանուր առմամբ Ղարիբաշվիլիի ելույթը հաշտարար էր: «Մենք Ռուսաստանի հանդեպ կանենք միայն կառուցողական քայլեր»,- խոստացել է վարչապետը՝ ողջունելով Մոսկվայի պատասխան ժեստերը, այդ թվում՝ վրացական ապրանքների համար ռուսական շուկայի բացումը:
Նա նշել է, որ Ռուսաստանի հանդեպ նախկին իշխանությունների արմատական մոտեցումը Վրաստանին վիթխարի վնաս է հասցրել: Բացի այդ, Ղարիբաշվիլին հիշեցրել է եվրոպացի առաջնորդների կողմից վրացական նոր քաղաքականության լիարժեք աջակցության մասին, որի արդյունքում Ռուսաստանը սկսել է պատասխան կառուցողական քայլեր անել:
