Աշխարհի ուշադրությունը կենտրոնացած է Բաքվում կայանալիք COP29 համաժողովի վրա, եւ մեծ հնարավորություն կա Ադրբեջանի և Հայաստանի միջև խաղաղության համաձայնագրի ստորագրման համար։ Այս մասին NE Global-ին տված հարցազրույցում ասել է Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը։
«Վերջերս Հայաստանի և Ադրբեջանի միջև պայմանավորվածություն է ձեռք բերվել որոշ կալանավորների փոխադարձ ազատ արձակման, ինչպես նաև միմյանց դիվանագիտական աջակցության փոխանակման վերաբերյալ»,- նշել է նա։
Նրա խոսքով՝ Հայաստանը հանել է իր վետոն COP29-ն ընդունելու Ադրբեջանի հայտի վրա, իսկ դրա դիմաց Բաքուն համաձայնել է Հայաստանին ընդգրկել կլիմայի գլոբալ համաժողովի գործադիր կոմիտեում։
«Իհարկե, սա մեծ բեկում էր, քանի որ առաջին անգամ ուղղակի շփումների միջոցով մենք կարողացանք հասնել վստահության ամրապնդման այս միջոցառմանը, և դա ցույց տվեց նաև, որ երկու երկրներն ի վիճակի են լուծել իրենց տարաձայնությունները ուղիղ երկկողմ շփումների միջոցով՝ առանց երրորդ կողմի մասնակցության»,- ասել է նա:
Ամիրբեկովը նշել է, որ Բաքվի և Երևանի միջև խաղաղ համաձայնագրի շուրջ աշխատանքները շարունակվում են։
«Մենք զգուշավոր լավատես ենք և կարծում ենք, որ հնարավոր է այս տեքստի շուրջ բանակցություններն ավարտել մինչև COP29-ը: Սա ուժեղ ազդանշան կտա արտաքին աշխարհին, որ եվրոպական մայրցամաքի ամենահին, ամենաերկար և ողբերգական հակամարտություններից մեկը հետխորհրդային տարածքում ավարտին է մոտենում, ուստի կարծում եմ, որ Հայաստանի և Ադրբեջանի և՛ երկրները, և՛ ժողովուրդները պետք է պատրաստ լինեն նման դրական արդյունքի»,- ասել է նա։
