Արեւմտյան մամուլը հայտնում է, որ ՌԴ Կրանսնոդարի երկրամասում ,,վնասվել է հրթիռային հարձակումից վաղ իրազեկման «Վորոնեժ ԴՄ» ռադիոլոկացիոն կայանը»: Որոշ աղբյուրներ նույնիսկ արբանյակային լուսանկարներ են հրապարակել: Ուկրաինայի քաղաքական ղեկավարությունը եւ ԶՈՒ հրամանատարությունը որեւէ մեկնաբանություն առայժմ չի արել: Այդուգանդերձ, լրատվամիջոցներում տարածվել է ՌԴ «Ռուսատոմ» կոնցեռնի նախկին գլխավոր տնօրեն, նախկին փոխվարչապետ Դմիտրի Ռոգոզինի գրառումը:
Նախկին բարձրաստիճան պաշտոնյան, որ փաստացի հանդիսացել է Ռուսաստանի ռազմա-արդյունաբերական համալիրի կոորդինատորը եւ ուկրաինական պատերազմին ներգրավված է այնքանով, որ անցյալ տարի ծանր վիրավորում է ստացել, փաստացի հաստատել է, որ Կարսնոդարում ուկրաինական կողմը «հրթիռային հարձակումից վաղ իրազեկման ռուսաստանյան համակարգին հարված է հասցվել»: Ռոգոզինը «հանցագործության պատվիրատու» է անվանել Միացյալ Նահանգներին:
Վաշինգտոնին հարկ կլինի կատարվածի համար լիովին պատասխանատու լինել: Այսպիսով մենք գտնվում ենք ոչ այնքան շեմին, որքան (իրավիճակի) եզրին, որից հետո, եթե հակառակորդը նման գործողություններում չկանգնեցվի, կսկսվի միջուկային տերությունների ռազմավարական անվտանգության փլուզումը,- թելեգրամ-ալիքում գրել է Դմիտրի Ռոգոզինը: Ըստ էության, դա նախազգուշացում է, որ Ռուսաստանը «հայելային պատասխանի» իրավունք ունի, որից հետո ԱՄՆ ռազմավարական անվտանգությունը «կփլուզվի»:
Կրասնոդարի երկրամասում ռուսաստանյան ռադիոլոկացիոն կայանը «վնասվել է» Մինսկում ՌԴ եւ Բելառուսի նախագահների բանակցություններից մեկ օր անց: Ժամանելով Բելառուսի մայրաքաղաք, Վլադիմիր Պուտինը հենց օդանավակայանում ասել է, որ քննարկվելու է նաեւ «ոչ ռազմավարական միջուկային զենքի ներգրավմամբ զորավարժությունների անցկացման հարցը»: Ուկրաինական պատերազմի այս փուլում նման զորավարժություններն Արեւմուտքն ընկալել է որպես «Արեւելյան Եվրոպայի դեմ հարձակման ազդանշան»:
Բանակցություններից հետո Ռուսաստանի նախագահը, սակայն, Ուկրաինայի հետ «կրակի դադարեցման բանակցությունների» պատրաստակամություն է հայտնել, բայց եւ ավելացրել, որ Զելիսկին «այլեւս լեգիտիմ չէ»: Ռուսաստանյան ռադիոլոկացիոն կայանին «հասցված հարվածից» կարելի է ենթադրել, որ Կիեւը չի ընդունել «կրակի դադարեցման բանակցությունների» առաջարկությունը, ինչի համար Ռոգոզինը մեղադրում է Միացյալ Նահանգներին:
Ռոգոզինն, ամենայն հավանականությամբ, թելեգրամ-ալիքում գրառում կատարել է Կրեմլի եւ անձամբ նախագահ Պուտինի համաձայնությամբ: Եւ, թերեւս, կարելի է ասել, որ ուկրաինական պատերազմը հասնում է կամ արդեն իսկ հասել է կուլմինացիայի: Այդ հավանականության մասին դեռեւս անցյալ աշնանը հայտարարել էր Ուկրաինայի ԶՈՒ հրամանատար Զալյուժնին, որ պատերազմի ելքը կախված է կողմերի տեխնոլոգիական մակարդակից:
Ռուսաստանին, թեեւ մեծ դժվարությամբ, բայց հաջողվել է հակակշիռներ ստեղծել, բայց նորագույն սպառազինությունները, որ լայնորեն կիրառվում են, երեւում է՝ ռազմական գերակշռություն չեն ապահովում: «Չոր հաղթանակի» զենք մնում է «ոչ ռազմավարական միջուկային մարտագլխիկը»: Դմիտրի Ռոգոզինն, ըստ էության,, խոսում է «միջուկային ապոկալիպսիսից»: Դա սպառնալի՞ք է: Հիշվում է նախագահ Պուտինի «թեւավոր» միտքը. «Աշխարհը մեր ինչի՞ն է պետք, եթե Ռուսաստան չի լինելու»: Բայց ասվածն արդյո՞ք պետության ռազմա-քաղաքական դոկտրին է:
Այդ դեպքում Արտաքին հետախուզության ծառայության տնօրեն Նարիշկինն ինչու՞ «չի բացառում» ԱՄՆ ԿՀՎ տնօրեն Բեռնսի հետ հանդիպումը: ԱՄՆ-ը եւ Ռուսաստանը հնարավոր պայմանավորվածությունների «գի՞ն են գցում» կամ՝ «բարձրացնում»: Միջուկային մյուս տերություններն ինչպե՞ս կարձագանքեն Կրասնոդարում հրթիռային հարձակումից վաղ նախազգուշացման ռուսաստանյան «Վորոնեժ ԴՄ» կայանի «վնասմանը»: Շվեյցարիայում «խաղաղության խորհրդաժողովի» անցկացումը կչեղարկվի՞:
