Ընդդիմությունը պատրաստ է իր վրա վերցնել երկրի հետագա ճակատագրի պատասխանատվությունը և կարող է ընդունել նախարարների կաբինետում պաշտոններ ստանձնելու վերաբերյալ նախագահ Յանուկովիչի առաջարկությունը: Այս մասին հայտարարել է «Բատկիվշչինա» կուսակցության առաջնորդ Արսենի Յացենյուկը:
Դիմելով Մայդանում հավաքվածներին` Յացենյուկը հայտարարել է. «Յանուկովիչը խոսեց մեզ հետ միայն այն պատճառով, որ դուք Մայդանում եք: Իսկ մենք ընդամենը միջնորդներ ենք: Մեզ համար կարևոր է յուրաքանչյուր մարդու ճակատագիրը և կյանքը»:
«Մեր առաջին պահանջը, որին համաձայնել է նախագահի աշխատակազմը, մեր յուրաքանչյուր եղբայրակցի ազատ արձակումն է: Երկրորդ` բացի այն, որն մենք կազատենք մարդկանց կալանքից, հազարավոր մարդիկ քրեական գործեր ունեն, դրանք բոլորը պետք է փակվեն: Նրանք բոլորը պետք է ազատության մեջ լինեն: Մեր մյուս պահանջը` համաներման մասին օրենք ընդունելը, ևս ընդունվել է իշխանության կողմից: Երրորդ` հունվարի 16-ին ընդունված խայտառակ օրենքները պետք է չեղյալ հայտարարվեն: Այս պահանջից ևս մենք հետ չենք կանգնի ոչ մի պարագայում»,- Յացենյուկի խոսքերը մեջբերում է «Ուկրաինսկայա պրավդա»-ն:
«Չորրորդ մեր խնդիրը Ուկրաինայի նոր իշխանությունն է: Յանուկովիչն ընդդիմությանն առաջարկել է ղեկավարել կառավարությունը: Ինչպիսի՞ն է մեր պատասխանը: Արդյո՞ք մենք պատրաստ ենք մեզ վրա պատասխանատվություն վերցնել: Մենք ընդունում ենք այդ պատասխանատվությունը, սակայն դա նշանակում է Ուկրաինայի` Եվրոպայի կողմ շրջվելը: Մենք պատրաստ ենք Ուկրաինան ԵՄ տանել: Պատասխանատվություն, որը ենթադրում է նաև Յուլյա Տիմոշենկոյի ազատ արձակումը»,- հավելել է նա:
«Մեր ևս մեկ պահանջը` Ուկրաինայի նախագահի պաշտոնը պետք է հավասարակշռվի: Ժողովուրդը պետք է նոր սահմանադրություն ընդունի»,- հայտարարել է Յացենյուկը:
«Երեքշաբթի օրը՝ հունվարի 28-ին դատաստանի օրն է, մենք չենք հավատում նրանց ոչ մի խոսքին: Մենք միայն գործերին ենք հավատում»,- հայտարարել է Յացենյուկը: Նրա խոսքերով` մինչ այդ դիմադրությունը կշարունակվի:
