Սույն թվականի օգոստոսի 31-ին «Առաջին լրատվական»-ում «Վտանգավոր անուններ՝ Վարդան Մինասյանի ցուցակում. Շտապ օգնության մի քանի տարբերակ…» վերտառությամբ հոդված էր հրապարակվել: Հոդվածի հեղինակը՝ կայքի մարզական մեկնաբան Դավիթ Ջալալյանը անդրադարձել էր Հայաստանի ֆուտբոլի ազգային հավաքական հրավիրված ֆուտբոլիստների խաղամակարդակին՝ վերլուծելով Մինասյանի կողմից Լիխտենշտեյնի և Մակեդոնիայի հանդիպումներին հրավիրված խաղացողների ցանկը:
Մասնավորապես, նշվել էր, որ մի քանի ֆուտբոլիստների խաղամակարդակը տվյալ պահին այն չէ և առաջարկվել էր լուծումներ: Անդրադարձ էր արվել նաև մակեդոանական «Վարդարի» հարձակվող Տիգրան Բարսեղյանի խաղին: Բարսեղյանի մասով մասնավորապես նշվել էր․«Մեր հավաքականում կա ևս մեկ-երկու ֆուտբոլիստ, որոնց ներկայությունը ևս կարելի է վտանգավոր համարել: Խոսքը հատկապես վերաբերում է մակեդոնական «Վարդարի» հարձակվող Տիգրան Բարսեղյանին: Այս ֆուտբոլիստը վերջին տարիների գոլային պահերը փչացնելուց ու երկրպագուների նյարդերը քայքայելուց բացի՝ ոչնչով աչքի չի ընկել: Նրա խաղամակարդակն ուղղակի չի համապատասխանում մեր ազգային հավաքականին: Բարսեղյանի խաղի և թիմի մասին վառ պատկերացում կազմեցինք նաև Եվրոպա լիգայի խաղարկության որակավորման փուլում «Փյունիկի» հետ մրցավեճերում: Յուրա Մովսիսյանի և Ռուլան Կորյանի բացակայության պայմաններում որպես այլընտրանք առաջարկում ենք Լյուքսեմբուրգի «Պրոգրեսի» հարձակվող Ալեքսանդր Կարապետյանին և «Ալաշկերտի» ներկայացուցիչ Էդգար Մանուչարյանին: Վերջինս թե՛ ֆուտբոլային ինտելեկտով, թե՛ փորձով և վարպետությամբ մի գլուխ ավելի բարձր է Տիգրան Բարսեղյանից: Ճիշտ է, Մանուչարյանը գերազանց մարզավիճակում չէ, բայց վստահ ենք, որ նա, ինչպես նաև Կարապետյանը, անհամեմատ ավելի շատ օգուտ կտա մեր ազգային թիմին: Հուսանք, որ Բարսեղյանին գոնե չենք տեսնի հավաքականի մեկնարկային կազմում»:
Ս.թ․ սեպտեմբերի 22 –ին ՀՖՖ-ի տեխնիկական կենտրոնում տեղի ունեցած Հայաստանի բարձրագույն խմբի առաջնության 9-րդ տուրի «Գանձասար Կապան«-«Արարատ» հանդիպումից հետո «Գանձասար Կապան» ֆուտբոլային ակումբի գլխավոր մարզիչ Աշոտ Բարսեղյանը, ով ի դեպ հանդիսանում է Տիգրան Բարսեղյանի հայրը, մամուլի ասուլիսի ժամանակ անդրադարձ է կատարել այս հոդվածին և հրապարակավ անհարկի վիրավորել մեր թղթակցի արժանապատվությունը՝ հնչեցնելով վիրավորական արտահայտություններ: Բացի դրանից վերջինս համացանցի միջոցով վիրավորական գրառում է կատարել այդ գրված հոդվածի ներքո, այսպիսով նաև փորձելով խոչընդոտել Ջալալյանի մասնագիտական գործունեության իրականացմանը:
Մեզ համար ընդունելի կլիներ, որ հանդիսանալով ֆուտբոլի մասնագետ Աշոտ Բարսեղյանը հիմնավոր փաստարկներով հակադարձեր այս հրապարակմանը: Լիխտենշտեյնի հետ մրցավեճում Տիգրան Բարսեղյանը փոխարինման դուրս գալով դարձավ հաղթանակ գոլի հեղինակ մեծ ուրախություն պարգևելով բոլորիս: Սա կարծում են Աշոտ Բարսեղյանի համար լրացուցիչ առիթ էր մասնագիտորեն ապացուցելու, որ իր որդին հիանալի ֆուտբոլիստ է և արժանի է խաղալու ոչ միայն Հայաստանի հավաքականի մեկնարկային կազմում, այլև «Վարդարից» մի քանի անգամ ավելի բարձր կարգ ունեցող թիմերում: Ի՞նչ է նշանակում մամուլի ասուլիսի ժամանակ վիրավորել և զրպարտել լրագրողին: Անթույլատրելի համարելով և չցանկանալով որևէ կերպ մեկնաբանել Աշոտ Բարսեղյանի կողմից արված վիրավորական արտահայտությունները «Առաջին լրատվական»-ի մարզական մեկնաբանը պատրաստվում է պատվի, արժանապատվության, բարի համբավի վերականգնման վերաբերյալ հայց ներկայացնել Երևանի ընդհանուր իրավասությունների դատարան: Մեր երկրում սա առաջին դեպքը չէ, երբ իր կարծիքը արտահայտելու համար լրագրողին վիրավորում են:
Հայաստանում տեղի են ունեցել դրական փոփոխություններ, բայց ցավով պետք է արձանագրենք, որ նախկին համակարգի ղեկավարման օրոք առկա արատավոր երևույթները կարծես չեն վերացել: Դրական փոփոխություններ են տեղի ունեցել նաև հայկական ֆուտբոլում և հույս ունենք, որ տեղի ունեցածը ՀՖՖ-ի նախագահ Արթուր Վանեցյանը անուշադրության չի մատնի: Ակնկալում ենք, որ Վանեցյանի հորդորով ՀՖՖ-ի կարգապահական կոմիտեն ուսումնասիրելով նաև մեր հրապարակումը համապատասխան միջոցներ կձեռնարկի Բարսեղյանի արարքի վերաբերյալ: Դժվար է մատնանշել նախադեպ, երբ որդու խաղը քննադատելու համար նրա հայրը հանդիսանալով մարզիչ՝ նման արարք թույլ տա: Նման երևույթները միայն ու միայն արատավորում են մեր ֆուտբոլը: Մասնագիտական 15 տարիների ընացքում սուր քննադատության ենք ենթարկել բազմաթիվ մարզիկների, մարզիչների, ղեկավարների, բայց նման արձագանք երբևէ չի եղել: Կարծիքների և դիտարկումների հետ կարելի է համաձայն չլինել: Դա չի նշանակում սակայն, որ գործը պետք է հասնի անձնական վիրավորանքների:
Լիահույս ենք, որ նոր Հայաստանի դատական համակարգն ու ֆուտբոլի ղեկավարությունը անպատիժ չեն թողնի «Գանձասար-Կապանի» գլխավոր մարզչի արարքը:
Տեսանյութը՝ «Ֆուտբոլ պլյուս»-ի
