Ֆուտբոլի Հայաստանի երիտասարդական հավաքականի և «Արարատ»-ի գլխավոր մարզիչ Աբրահամ Խաշմանյանն 1in.am Sport-ի հետ զրույցում նշեց, որ 2013 թվականն իր մարզական կարիերայի լավագույն տարիներից էր: Խաշմանյանն ամփոփեց տարին:
«Ինձ համար, որպես մարզիչ, կարող եմ տարին հաջող համարել, որովհետև բավականին իրադարձություններ եղան: Կարծում եմ՝ սա իմ մարզչական կարիերայի լավագույն տարիներից մեկն էր, եթե ոչ լավագույնը:
«Արարատ»-ը խուսափեց վերջին տեղից և չլքեց Բարձրագույն խումբը: Դա փոքրիկ հրաշք էր: Դրանից հետո «Արարատ»-ը սկսեց նախապատրաստական շրջանը, իսկ հիմա առաջին տեղում է: Դա էլ կարելի է մեծ նվաճում համարել:
Եթե տեսնենք, թե «Արարատ»-ը որտեղ է եղել վերջին տարիներին և ինչ ֆուտբոլ է խաղացել, և որտեղ է հիմա, ապա կարող ենք նկատել, որ տարբերությունն աչքի է զարնում:
Ես նշանակվեցի Մ-19 հավաքականի մարզիչ, որը լավ ելույթ ունեցավ, որից հետո նշանակվեցի երիտասարդականի մարզիչ: Սա էլ էր բավականին մեծ առաջընթաց իմ մարզական կարիերայում: Շատ կարևոր էր նաև այն, որ ես ստացա ՊՐՈ արտոնագիր, որն ինձ համար շատ մեծ նշանակություն ունի:
2014-ին սպասելիքներն այն են, որ «Արարատ»-ը պահպանի առաջատարի դիրքը, իսկ հակառակ պարագայում գոնե Եվրալիգայի որակավորման փուլի ուղեգիր ձեռք բերի: Սա մեծ առաջընթաց կլինի: Արդեն կան տեղացի նորեկներ: Ինձ խոսք են տվել, որ լեգեոներներ նույնպես կլինեն, որոնք կմիանան Չերնոգորիայում:
Երիտասարդական հավաքականի հետ ունեմ երկու խաղ և ցանկանում եմ, որ այդ երկու խաղերում էլ հաղթենք: Ամանորը տարվա ամենալավ տոնն է: Բոլորն են պատրաստվում դրան: Բայց ինձ համար ավելի կարևոր է սպորտը: Հունվարի 5-ից սկսում ենք մարզումները և այդտեղ է իմ ամբողջ ուշադրությունը (ժպտում է):
Առաջին հերթին մեր հայ ժողովրդին կմաղթեմ առողջություն, երջանկություն: Մարզիկներին կմաղթեմ հաղթանակներ, թող զերծ մնան վնասվածքներից, իսկ «Արարատ»-ին կմաղթեմ չեմպիոնություն: Ազգային հավաքականին մաղթում եմ միմիայն առաջընթաց: Հավաքականից սպասում են մեծ հաղթանակներ»: