Ֆուտբոլասերների շրջանում շարունակում են բուռն քննարկումները ավարտված Հայաստանի սկանդալային առաջնության վերաբերյալ: Առաջնություն, որն իրականում չունեցավ հաղթող: Առաջնություն, որն ամենախայտառակն էր հայկական ֆուտբոլի պատմության մեջ: Առաջնություն, որն արտացոլում է մեր ֆուտբոլի այսօրվա վիճակը:
Ռուբեն Հայրապետյանի շնորհիվ շատերն արդեն հաշտվել են այն մտքի հետ, որ Հայաստանն ամենաթույլն է Եվրոպայում: Ցավոք այս կարգավիճակը սթափվելու առիթ չի հանդիսանում: Հայրապետյանի առաջնությանը մասնակցեցին ընդամենը 6 թիմեր: Վերջին տարիներին միայն 6 թիմեր էր շարունակում գոյատևել Հայրապետյանի համակարգում: ՀՖՖ-ի նախագահի ջանքերով այսօր այդ 6 թիմերի միջև հարաբերությունները մեղմ ասած այն չեն: Ավելի ստույգ թիմերի մի մասն այսօր հլու-հնազանդ ենթարկվում է Հայրապետյանին, իսկ մի մասն էլ փորձում է պայքարել գործող համակարգի դեմ: Այն թիմերը որոնք համարձակվում են դեմ գնալ Հայրապետյանին, կարգապահական կոմիտեի կողմից ենթարկվում են կոշտ ճնշումների: ՀՖՖ-ի կարգապահական կոմիտեն դարձել է Հայրապետյանի դահիճը, որը անխնա ոչնչացնում է անցանկալի անձանց կամ թիմերին:
Դեռևս անցյալ տարվա սեպտեմբերին Հայաստանի առաջնությունում գրանցվել էր հերթական սկանդալային միջադեպը: 6-րդ տուրի «Արարատ»-«Գանձասար-Կապան» հանդիպումը ըստ էության անավարտ էր մնացել: Հանդիպման վերջնամասում «Արարատի» ավագ մարզիչ Արկադի Անդրեասյանը, այսպես ասած, ջղայնացել էր հանդիպման գլխավոր մրցավար Արտակ Սիմոնյանի վրա՝ վստահ լինելով, որ վերջինս անտեղի դեղին քարտ է ցույց տվել իր ֆուտբոլիստներից Արգիշտի Պետրոսյանին: Սիմոնյանը պահանջում էր, որ Անդրեասյանը լքի մարզիչների համար նախատեսված տեխնիկական գոտին՝ պնդելով, որ հակառակ դեպքում չի վերսկսվի հանդիպումը: Անդրեասյանը չհեռացավ, և Սիմոնյանը խաղավարտից 2 րոպե շուտ հնչեցրեց մրցավեճի վերջն ազդարարող սուլիչը: Ֆուտբոլի պատմության մեջ դժվար է հիշել որևէ հանդիպում, որի մրցավարը «բազարի» մեջ մտնի թիմերից մեկի մարզչի հետ և, չկարողանալով շտկել իրավիճակը, ժամանակից շուտ ազդարարի խաղի ավարտը: «Արա, էս մարդը զասլուգա ունի, դուք ինչ եք արել ֆուտբոլի համար»,- մարզադաշտից բղավում էր մի երկրպագու՝ իր զայրույթն արտահայտելով մրցավարների հանդեպ: Ինչ խոսք, Անդրեասյանի պահվածքը բավական կոշտ էր: Բայց դրա համար, կարծում ենք, կան նաև օբյեկտիվ պատճառներ: Ակնհայտ է, որ Հայաստանի բարձրագույն խմբի առաջնությունում ուղղակի չեն կարող նորմալ մրցավարներ լինել, քանզի համակարգը առողջ չէ, ասել է թե ձուկը գլխից է հոտում:
ՀՖՖ-ի կարգապահական կոմիտեի հերթական նիստում Արկադի Անդրեասյանը ոչ մարզական պահվածքի համար 2 տարով զրկվել էր ծառայողական պարտականություններից, իսկ «Արարատը» տեխնիկական պարտություն էր գրանցել: Այս որոշմամբ Ռուբեն Հայրապետյանը ծանր հարված հասցրեց «Արարատին» և Անդրեասյանին: Հիշեցնենք, որ Հայրապետյանն «Արարատի» վրա «ատամ ուներ» դեռևս ՀՖՖ-ի նախագահ ընտրվելու տարիներից: Հայրապետյանն ամեն գնով փորձում էր տիրանալ Ձորաղբյուրի մարզաբազային, որը պատկանում է «Արարատ» ֆուտբոլային ակումբի շվեյցարահայ սեփականատերերին: 16 տարիների ընթացքում Հայրապետյանը ջանք ու եռանդ չի խնայում «Արարատին» հալածելու համար: Տիտղոսակիր ակումբի ղեկավարներն էլ վերջին տարիներին ուղղակի հրաժարվում են ակումբում լուրջ ներդրումներ անելուց գիտակցելով, որ Հայրապետյանի ռեժիմի պայմաններում ուղղակի անհնար և անիմաստ է հաջողություններ ունենալը: Անցյալ տարի Հայրապետյանը ցանկանում էր տիրանալ նաև Գյումրիի ֆուտբոլի Ակադեմիային: Իբր վատ խոտածածկի համար Հայրապետյանը փորձում էր «Շիրակին» զրկել Ակադեմիայից: Մինչ այդ էլ Հայրապետյանը «Շիրակ» ակումբի նախագահին զրկել էր ՀՖՖ-ի գործկոմի անդամի մանդատից:
Գյումրիի ակադեմիան «Շիրակի» ենթակայությունից զրկելու փորձի ձախողումից հետո ՀՖՖ-ի նախագահը առաջնության ավարտին ուղղակի խլեց չեմպիոնությունը Գյումրիի թիմից: Հայրապետյանի դահիճը՝ կարգապահական կոմիտեն «Շիրակի» վաստակած միավորները նվազեցրեց 12-ով, իսկ թիմի մարզիչ Արարատ Հարությունյանին ցմահ որակազրկեց: «Շիրակը» լքեց Հայաստանի առաջնությունը և կվերադառնա միայն այն ժամանակ, երբ Ռուբեն Հայրապետյանը և նրա տխրահռչակ աշխատակազմը հեռանա և պատասխան տա կատարված արատավոր քայլերի համար:
Կարծում ենք «Շիրակի» օրինակին պետք է հետևի նաև «Արարատը» և այն թիմերը որոնք ունեն արժանապատվություն: Հայրապետյանի առաջնությունը երկրպագուների և որոշ թիմերի համար դարձել է մղձավանջ: Առաջնությանը մասնակցելով՝ թիմերը միայն ու միայն մաշվում են: Ժամանակն է, որ հայկական ֆուտբոլի և Հայաստանի առաջնության ապագայի համար մտահոգ կողմերը գործի անցնեն և որոշումներ կայացնեն անդունդից դուրս գալու վերաբերյալ: