Վաղուց է հայտնի, որ ոսկին սովորական մետաղ չէ, այդ պատճառով գիտնականները չեն դադարում ուսումնասիրել դրա հատկությունները: Ինչպես հաղորդում է globalscience.ru-ն, հերթական հետազոտության ընթացքում մասնագետները պարզել են, որ ոսկյա զարդերը խթանող հատկություն ունեն, ընդ որում` ակտիվ նյարդային համակարգ ունեցող մարդկանց օրգանիզմում թանկարժեք մետաղը բացասական հետևանք է թողնում:
Հետազոտողներն այս հանգամանքը մեկնաբանում են նրանով, որ ոսկին օրգանիզմում գրգռման գործընթաց է առաջացնում, ինչն էլ իր հերթին հանգեցնում է խափանումների նյարդային համակարգում և դանդաղեցնում է նյութափոխանակության գործընթացը մարդու օրգանիզմում: Իսկ նման գործոններն իրենց հերթին կարող են հանգեցնել ընկճախտի զարգացման:
Գիտնականները եկել են այն եզրակացության, որ որոշ անձանց արգելված է կրել ոսկյա զարդեր: Օրինակ` զգայուն մարդկանց խորհուրդ է տրվում ընդհանրապես ոսկի չկրել: Ոսկյա զարդերը վնասակար ազդեցություն կարող են թողնել նաև էպիլեպսիայով տառապող մարդկանց վրա:
Գիտնականները մեգապոլիսներում բնակվող անձանց ևս խորհուրդ չեն տալիս կրել ոսկյա զարդեր, քանի որ մեծ քաղաքներում ընկճախտի առաջացումն առանց այդ էլ մեծ հավանականություն ունի, իսկ թանկարժեք մետաղը կարող է ավելի սրել իրավիճակը: Այս կապակցությամբ նրանք խորհուրդ են տալիս կրել արծաթե զարդեր, որն ավելի բարենպաստ մետաղ է:
