«Մենք ներկայացնում ենք օրենքը, մենք պաշտպանում ենք պետական որոշումները և ես՝ որպես քանդակագործ, չեմ կարող չպահպանել և չպահանջել «Փակ շուկայի» վերակառուցումը, իսկ որպես քաղաքացի՝ իմ պարտքն եմ համարում օրինավոր երկիր կառուցելը: Մենք այսօր կառուցում ենք օրենքի երկիր: Իհարկե, կան անօրեններ, որոնք պայքարում են օրենքի դեմ»,- այսօր «Ծածկած շուկայի» մոտ անցկացվող բողոքի ակցիայի ընթացքում ասաց քանդակագործ Վիգեն Ավետիսը:
Նա հավելեց, որ իրենք 20-30 հոգով պահանջում են ունենալ օրենքի երկիր, որտեղ քաղաքացին կապրի օրենքով և պաշտպանված կլինի օրենքով:
Մեր այն հարցին, թե ինչ օգուտ կարող է տալ «սիթիների» բոյկոտը, մեր զրուցակիցը պատասխանեց. «Քանի որ «սիթիները» պատկանում են, իմ կարծիքով, շուկայի մենատիրոջը, և այստեղ էլ «սիթի» է բացվելու, ապա գաղտնիք չի լինի, որ ասեմ, սուպերմարկետները, մեծ հանրախանութները Հայաստանում պետք է արգելել, քանի որ եթե Հայաստանում փոքր բիզնեսը խրախուսում ենք՝ մեծը պետք է արգելել:
Այս դեպքում, երբ աշխատանքի պահանջ, գործազրկություն կա՝ պետք է խրախուսենք, որ չփակվեն խանութները. սա մի կողմն է:
Երկրորդ՝ այն գումարներով, որ «սիթին» աշխատում է՝ նման վանդալիզմ է կատարվում, որ հակառակ պետական որոշումներին՝ սեփականատերը թքած ունի պետական կառույցների որոշումների վրա և անում է այն, ինչ ուզում է»:
Հետքրքրվեցինք նաև, թե արդյոք փոքրաթիվ մարդկային ներուժը բավարա՞ր է հաղթանակ արձանագրելու համար, ինչին ի պատասխան՝ Վիգեն Ավետիսն ասաց. «Մի մարդով, մի ծաղկով է գարունը գալիս, և 20 հոգով, իհարկե, հնարավոր է:
Գոնե մենք ասում ենք մեր սրտի խոսքը, սա բոլոր քաղաքակիրթ երկրներում թույլատրված ձև է, դիմացի մայթում էլ են արտահայտում՝ ես դեմ չեմ, բայց թող տեսնեն, որ մարդիկ կան, որ օլիգարխներից չեն վախենում: Իհարկե, այս ամենը հաճելի չէ, բայց եկեք ընդունենք, որ սա իրականություն է»:
