Երեկ A, C, D, E, F, I խմբերում կայացան «Եվրո-2012»-ի ընտրական փուլի հերթական հանդիպումները:
«Առաջին լրատվականն» արդեն տեղեկացրել էր, որ A խմբի առաջին խաղում Ադրբեջանի հավաքականը մրցակցի հարկի տակ պարտություն էր կրել Ղազախստանի հավաքականից: Այս խմբի մյուս խաղերում գերմանացիները հերթական` 6-րդ հաղթանակը տարան և վաստակած 18 միավորով միանձնյա գլխավորում են մրցաշարային աղյուսակը` Ավստրիա-Գերմանիա` 1:2: Բելգիա-Թուրքիա հանդիպումն ավարտվեց ոչ-ոքի` 1:1: Բելգիան 7 խաղից հետո ունի 11, Թուրքիան 6 խաղից հետո 10 միավոր:
C խմբում Իտալիայի ընտրանին սեփական հարկի տակ խոշոր 3:0 հաշվով առավելության հասավ էստոնացիների նկատմամբ, Սլովենացիներն էլ մրցակցի հարկի տակ երկու անպատասխան գնդակ ուղարկեցին Ֆարերյան կղզիների հավաքականի դարպաս: 6 խաղից հետո իտալացիները 16 միավորով գլխավորում են մրցաշարային աղյուսակը:
D խմբում ռումինացիները 3 անպատասխան գնդակ ուղարկեցին Բոսնիա և Հերցեգովնիայի հավաքականի դարպաս, Բելառուսի ընտրանին էլ կարողացավ ոչ-ոքի` 1:1 հաշվով ավարտել հանդիպումը Ֆրանսիայի հետ: Այս խմբի առաջատարը Ֆրանսիայի հավաքականն է, որը 6 խաղից հետո իր ակտիվում ունի 13 միավոր: Նույնքան խաղից հետո Բելառուսը 9 միավորով 2-րդն է:
E խմբում Շվեդիայի հավաքականն, առանց Զլատան Իբրահիմովիչի, խոշոր` 1:4 հաշվով պարտության մատնեց Մոլդովային, Սան Մարինո-Ֆինլանդիա հանդիպումն ավարտվեց հյուրերի հաղթանակով` 0:1 հաշվով: E խումբը բացարձակ արդյունքով գլխավորում է Հոլանդիայի հավաքականը` 6 խաղից հետո` 18 միավոր, Շվեդիան երկրորդն է 5 խաղից հետո` 12 միավոր:
F և I խմբերում կայացան մեկական հանդիպումներ: Խորվաթները 2:1 հաշվով հաղթեցին Վրաստանի հավաքականին և 13 միավորով գլխավորում են F խումբը: I խմբի խաղն ավարտվեց անակնկալ արդյունքով. Լիխտեյնշտեյնի հավաքականը 2 անպատասխան գնդակ ուղարկեց լիտվացիների դարպասը:
