Ամերիկյան ավիատիեզերական գործակալությունը՝ ՆԱՍԱ-ն, պլանավորում է ակտիվորեն կիրառել դրոններ և արհեստական բանականության տեխնոլոգիաները լուսնային բազա ստեղծելու գործում: Այդ մասին «ՌԻԱ Նովոստի» գործակալությանն ասել է ՆԱՍԱ-ի լուսնային բազայի ստեղծման ծրագրի ղեկավար Կառլոս Գարսիա Գալանը։
«Արհեստական բանականությունը հիմնական ուղղություններից մեկն է։ Եթե պատկերացնեք, թե ինչ պետք է անի անօդաչու թռչող սարքը՝ ուսումնասիրել տարածքները և համապատասխան վայրեր գտնել վայրէջքի համար, ապա արհեստական բանականությունը կարող է զգալիորեն օգնել այս հարցում», – հայտարարել է Գարսիա Գալանը։
ՆԱՍԱ-ի ներկայացուցչի խոսքով՝ գործակալությունը ներկայում դեռ գտնվում է լուսնային բազայի կառուցման նախագծի սկզբնական փուլում, ուստի աշխատանքի ընթացքում դեռ լինում են փորձեր և սխալներ։
«Մենք դեռ այս գործընթացի սկզբում ենք, ուստի այժմ զբաղվում ենք համակարգերի ստեղծմամբ», – հավելել է նա։
Մարտին ամերիկյան տիեզերական գործակալությունը հայտարարել է, որ աշխատելու է Լուսնի վրա մշտական բազայի փուլային ստեղծման ուղղությամբ։ ՆԱՍԱ-ն պլանավորում է բազան կառուցել երեք փուլով։ Նախ՝ Երկրի արբանյակ պետք է հասցնել տրանսպորտ, ստեղծել բազային էներգետիկ, գիտական և հաղորդակցման ենթակառուցվածքներ: Երկրորդ փուլով պլանավորվում է ստեղծել երկրային բնակելի ենթակառուցվածքի և լոգիստիկայի նմանակ՝ օտարերկրյա տիեզերական գործակալությունների մշակումներով: Եզրափակիչ փուլը, ինչպես ակնկալվում է, կդառնա Լուսնի վրա մարդու երկարատև գտնվելու պայմանների ապահովումը:
