«Ռազմիկ Դանիելյանի ոսկե մեդալը`դա նրա վաստակն է, որի գնահատականը կարող եք իմանալ դպրոցից և ուսուցչական կազմից: Հարցրեք դպրոցի տնօրենին և կիմանաք, թե ինչպիսի առաջադիմությամբ է նա սովորում»,- «Առաջին լրատվական»-ի հետ զրույցում ասաց Հրազդանի քաղաքապետ Արամ Դանիելյանը՝ անդրադառնալով մամուլի այն հրապարակմանը, թե իր որդին նախագահի կողմից ոսկե մեդալի է արժանացել բարձր առաջադիմության համար: Այստեղ տարօրինակ ոչինչ չէր լինի, եթե քաղաքապետի անչափահաս որդին՝ Ռազմիկ Դանիելյանը ամիսներ առաջ հոր ծառայողական մեքենայով ավտովթարի չենթարկեր և դրա հետևանքով մահ չպատճառեր մի քաղաքացու:
Սոցցանցերում այսօր բուռն քննարկվում էր քաղաքապետի որդու պարգևը և կարծիքներ էին հնչում, որ այդկերպ նախագահն իրավապահ մարմիններին ազդակ է ուղարկում կարճել քրեական գործը, որը հարուցված է ոսկե մեդալակիր կրտսեր Դանիելյանի արարքի հետևանքով:
Արամ Դանիելյանն անբարոյական է համարում այս մեկնաբանությունները: «Կատարվածը չարաբաստիկ ողբերգություն էր: Ոչ մեկ չէր ցանկանա, որ նման բան լիներ: Եվ դրա հետևանքները պետք է պարզեն, վճիռը կայացնեն իրավապահ մարմինները: Դիտավորյալ և միտումնավոր թիրախ դարձնել դժբախտությունը` զուրկ է բարոյական նորմերից: Ես ապշած եմ նման կարծիքներից»,- ասաց քաղաքապետն ու անջատեց հեռախոսը:
Ինչ վերաբերում է հարուցված քրեական գործին, ապա Ռազմիկ Դանիելյանի փաստաբան Հայկ Սարգսյանն «Առաջին լրատվական»-ի հետ զրույցում ասաց, որ դեռ ոչ մի նոր բան չկա: Արդեն տևական ժամանակ է՝ նշանակված են փորձաքննություններ, որոնք պետք է պարզեն, թե ինչպես է կատարվել այդ վթարը: «Փորձաքննությունները դեռ ընթանում են: Ուրիշ ոչ մի նորություն չկա քրեական գործում»,- ասաց փաստաբանը:
