Գարեգին Բ Ծայրագույն Պատրիարք և Ամենայն Հայոց Կաթողիկոսը ու Կովկասի մահմեդականների վարչության նախագահ, Շեյխ ուլ իսլամ Ալլահշուքյուր Փաշազադեն սեպտեմբերին հանդիպելու են: Այս տեղեկատվությունը հաստատել է Մայր Աթոռ Սբ. Էջմիածնի տեղեկատվական համակարգի տնօրեն Տեր Վահրամ քահանա Մելիքյանը: «Նախնական տվյալներով՝ հանդիպումը տեղի կունենա սեպտեմբերի 8-ին Մոսկվայում: Նրանք քննարկելու են Ղարաբաղյան հակամարտությանն ու տարածաշրջանային խաղաղությանն առնչվող հարցեր»,- ասել է Մայրի տեղեկատվական համակարգի տնօրեն:
Հանդիպումը կազմակերպվում է Համայն Ռուսիո Պատրիարք Կիրիլի միջնորդությամբ: Հոգևոր առաջնորդներն այս ձևաչափով նախկինում էլ են հանդիպել, սակայն հանդիպումները որևէ էական ազդեցություն չեն ունեցել ոչ կարգավորման գործընթացի և ոչ էլ հակամարտության գոտում լարվածության թուլացման վրա:
Այս ամենն, իհարկե, ունի իր բացատրությունները: Մոսկվան այդ հանդիպումները կազմակերպել է իր օրակարգով, որը միշտ չէ, որ տարածաշրջանային խաղաղության հաստատման նպատակ է հետապնդել:
Մյուս կողմից՝ հոգևոր առաջնորդները թե Հայաստանում և թե Ադրբեջանում բավարար հեղինակություն չունեն իշխանությունների քաղաքականության կամ հանրային կարծիքի վրա ազդելու համար: Այս ֆոնին Գարեգին Բ Ծայրագույն Պատրիարք և Ամենայն Հայոց Կաթողիկոսի ու Կովկասի մահմեդականների վարչության նախագահ, Շեյխ ուլ իսլամ Ալլահշուքյուր Փաշազադեի հանդիպումները նույնիսկ անիմաստ են, մանավանդ, որ ԼՂ հակամարտությունը չունի կրոնական բնույթ, իսկ հոգևոր առաջնորդները գործընթացում չեն կարողանում ապահովել նույնիսկ հումանիտար առաքելություն, այսինքն՝ նպաստել խաղաղության հաստատմանը:
Այս ամենին գումարվում է Մոսկվայի ղարաբաղյան քաղաքականության մեջ ի հայտ եկած նոր շեշտադրումը: Ըստ ամենայնի՝ քառօրյա պատերազմից և Երևանի արտաքին քաղաքականության դիվերսիֆիկացիայի վերջին երկչոտ փորձերից հետո Մոսկվայում սպառել են Հայաստանի իշխանություններին լուծումներ պարտադրելու ռեսուրսը և փորձում են իրենց ծրագրերի իրականացումն ապահովել զուգահեռ ձևաչափերով: Այդ նպատակով կիրառվում են տարբեր հնարքներ: Մոսկովյան փորձագիտական շրջանակների կողմից շրջանառվում է բանակցային գործընթացը Մոսկվա-Բաքու-Ստեփանակերտ ձևաչափ տեղափոխելու թեզը, Կրեմլը իր արբանյակ Ժիրինովսկու կուսակցության միջոցով Մոսկվայում փորձում է կազմակերպել չճանաչված հանրապետությունների ՀԿ-ների համագումար՝ շեշտը դնելով Արցախում մարդու իրավունքների ոտնահարումների վրա: Հոգևոր առաջնորդների հանդիպումը այս շարքից է:
Մոսկվան տարբեր արհեստական հարթակներ է ստեղծում Հայաստանի իշխանությունների վրա ճնշում բանեցնելու նպատակով: Գլոբալ իմաստով զզվելի է լսել ռուսական իբրև թե խաղաղարարական նախաձեռնությունների մասին, երբ Մոսկվան շարունակում է ինտենսիվորեն զինել Ադրբեջանին՝ մոտեցնելով նոր պատերազմը: